Shillong, Kyllalyngkot 7: Ka seng lehnoh kaba la shah niew beain ha ka sorkar, ka Hynñiewtrep National Liberation Council (HNLC) mynta ka sngi ha ka jingpynlait khubor ka la maham ia baroh ki ophisar sorkar kiba ia lam bakla ia ki paidbah ha kaba ia dei bad ki skhim bapher bapher jong ka sorkar.
Ha ka juh ka por ka la maham ia baroh ki nongkhaii khatam ia ki nong dei kot, ki kompeni shukor bad kum juh ia ki pulit ha kaba ka HNLC ka kynnoh ki pulit ruh ki long ka daw jong ki jingkiew dor jong ki mar ki mata ha kane ka jylla da kaba khrong pisa na ki trok.
Ha kane ka kyrwoh kaba la phah mynta ka sngi na ka liang jong ka seng HNLA ka la pynbna ba u snem 2014 kan long ka snem na ka bynta jong kiba duk ba rangli, ia kane ka rai la shim ha ka jingialang jong ka seng ha ka 6 tarik mynta u bnai.
La ong ba ka seng ka la ioh jingtip ba ki don ki dukan kot kiba la pynkiew dor sha ba palat bad ha ka juh ka por na ka liang jong ka seng ka kyntu ia ki skul jong ki riew shimet ba kin wad ki lad ki lynti kumno ban pynduna ia kabai skul jong ki khynnah, kane ka long ia ki college ruh kum juh.
Haba ia dei bad ka pule puthi kam dei ban long ka lad kamai, ka sorkar ka dei ban wad ki lad ki lynti kumno ban pynduna ia ka jingpep skul palat jong ki khynnah tang shiteng por. La ong ba ka jingkiew dor palat jong ki marbam mardih ruh ka la ktah ia kiba duk ba rangli.
Ka seng ka la maham ia ki nongkhaii kiba pynkiew pynhiar ia ki mar ki matta katba ki sngewbit ba kim dei ban leh lada ka seng ka lap kan pynshitom ia kane la ong ba bun sien la leh da ki nongkhaii ha iewduh bad ha kiwei ki bynta jong ka nongbah Shillong.(SP News)
