Shillong, Jymmang 09: Ka jingkylli mynta ka mih ka long mano ban pynkhreh ia ki skhim shna surok na ka PMGSY ha kane ka jylla Meghalaya? Namar ka sorkar jylla mynta ka hap ban sei ia ka pisa na ka pla jong ka sorkar jylla ban pyndep ia ki surok PMGSY.
Katkum ki jingtip kiba la ioh da u SP News Agency ki iathuh ba ki don ar tylli ki surok kiba la shna na ka skhim PMGSY kata ka surok Nohron bad ka surok Nongryngkoh ia kaba ka pisa kaba la mang na ka skhim PMGSY kam shym la lah ban pyndep ia ka jingtrei na ka bynta kitei ki ar tylli ki surok.
Katkum ka jingbthah jong ka sorkar pdeng ba lada kano kano ka jylla kam lah ban pyndep ia ka surok kaba ki la pan pisa na ka sorkar pdeng lyngba ka skhim PMGSY na kadaw jong ka jingbakla ha kaba shna ia ka skhim kata ka sorkar jylla ka hap ban sei na ka pla jong ka ban pyndep ia ka surok kaba dang sah katban da poi ha kano kano ka shnong.
Haba ia dei bad kane ka kyndon mynta ka sorkar Meghalaya ka la hap ban bei na ka pla tyngka jong ka ban shna pyndep ia ki ar tylli ki surok kiba la bei pisa na ka skhim PMGSY, kata ka surok ban leit sha Shnong Nohron bad kawei ban leit sha Nongryngkoh. Ka sorkar pdeng kan nym bei pisa shuh ia kine ki surok namar ka jingbakla ka dei na kiba pynkhreh ia ka skhim yn na ka sorkar pdeng ba ai ia ka pisa.
Ki thymmei khubor ki iathuh ba kine ki ar tylli ki surok ki long tang ka nuksa ia kaei kaba ka sorkar pdeng ka lap la ong ba ki don bun ki surok ha kane ka jylla Meghalaya ia kiba la shna na ka skhim PMGSY ia kiba khlem lah ban pyndep mynta ka sorkar jylla ka hap ban sei pisa ban pyndep ia kine ki surok kiba dang sah.(SP News)
