Shillong, Rymphang 20:Ka kynhun ialehkai jong ka Rangdajied United FC ka la khur ia ka jingjop ha ka U-14 Football Tournament kaba la pyniaid da ka Shillong Sports Association (SSA) hadien ba ka la pynliem noh ia ka Malki SC da 4-0 kol hynne ka sngi Palei ha madan Second Ground, Polo.
Katei ka jingjop ka la wan lyngba u Bonstrong Marthong uba la thep ha ka minit kaba 17 Abet Dona Kurbah ha ka minit kaba 39, u Dawan 41 bad u Aiborlang Kurbah ha ka minit kaba 44.
Ha kawei pat ka jingiakhun ha third ground ka Shillong Lajong FC ka la hab ban iasam mar shipoint bad ka Nongumlong SC hadien ba ki la iakhaid da 1-1 kol.
Haba phai ha ka jingialehkai ka long kaba iakhaid bad itynnad bha, ha kaba ka Nongumlong ka la ioh ban pynkhih jar nyngkong lyngba u Fairlyson Marbaniang tang ha ka 2 minit jong ka jingiaialehkai bad na ka liang ka Lajong ruh ka la dei ban pynphai kylla ia katei ka kol ha shwa ban kut artad ka kylla step hynrei katei ka kabu ksiar ka la shu sepei noh haba ka bol ka la leit dei ia u nongapkol jong ka Nongumlong bad iaid shabar ka jar.
Ki khynnah ialehkai na baroh arliang mamla ki la sei ia la ki sap ki phong kiba ki don ban ialehkai bha bad ruh ka la pynhun bad pynshongshit ia ki paidbah kiba la wan ban sakhi bad kumjuh ruh ban ai mynsiem ia ki khynnah ialehkai ba kin nang trei shitom ban poi sha ka thong.
Ha ka jingialehkai kaba mar ia biang bor, ka Nongumlong ka la lah ban tehlakam ia ka Lajong haduh ka kylla miet, hynrei ka Lajong ruh ka la iai bteng ban trei shitom bad shwa ban kut ka por ialehkai ka la ioh ban pynphai kylla ia katei ka kol da u Nicksonlar Tangsang ha ka minit kaba 45 kylla ban pyniakhaid haduh kaba kut da 1-1 kol.
Ka jingialehkai mynta ka sngi kan long ka Mawryngkeng SC pyrshah ia ka Marbisu SC bad ka Laitumkhrah SC pyrshah ia ka Umpling SC ha ka por 4 baje janmiet. (SP News)
