Mawsynram, K’lyngkot 13: Ka jingbym leh eiei jong u MLA ka thain u Bah Pynshngai N Syiem ban kyntiew ia ka roi ka par khamtam ban pynbha ia ka surok kaba long u budlum ban kyntiew ia ka ioh ka kor jong ki nongshong shnong ka thain Nongshluid bad ka jingbym leh eiei ban iarap ia ka eh ka shon ba ka thain ka dang sahdien ha baroh ki liang ka la pynbitar ia ki nongialam jong ka Mahila ha katei ka shmong ba kin ia pynlait sansyieng noh na ka seng ne u MLA ka thain da kaba pyniasoh bad ka seng UDP.
Ia kane ka rai jong ka Mahila ban mih noh ne ia pynlait sanshyieng bad ka Congress ha katei ka shnong la shim ha ka jingialang kaba la long ha ka sngi Saitjain (12/01/2013) hapoh ka jingialam jong ka President ka Kong Dlos K. Lynser halor ka nongrim ba u MLA ka thain u Bah Pynshngain N Syiem uba dei jong ka Congress u la leh bein ia ki paidbah nongshong shnong ka thain ha ka liang ka roi ka por ha kaba um shym la bat ia la ka kular kumba u la khlei ha ka elekshon ba la dep bad ki long tang kum ki kular planduman.
Ki nongialam ka Congrtess Mahila ha katei ka shnong ki la pynpaw ba ha ka elekshon ba la dep u Bah Pynshngain u la kular ban pynbha ia ka surok kumba long lem kiwei pat ki surok iaid kali haduh ha shnong lem bad kiwei pat ki kam pynroi kumjuh ruh ia ki longing longsem baduk. Kumta da ka jingshaniah tylli met bad mynsiem ki la trei borbah bad ki nongshong shnong da ka jingshaniah ba shijur ba un leh eiei kumba u la kular ki la ai jingkyrshan ba pura ban pynjop ia u hynrei ynda u la jop u la klet noh ia ka juban ba u la khlei bad u la niewbein bad ym shym la leh eiei kumba u ka khlei.
Shuh shuh ki la pynpaw ba u Bah Pynshong ha ki jingialang paidbah u ka khlei bad kren shai ba ynda u la jop ka miej jong jong u dei ka miej jong u paidbah na ka bynta ki jingmyntoi ki paidbah bad ki bhah ba u dei ban ioh lyngba ka bha kum u MLA kan leit sha ki paidbah hynrei ynda ki paidbah ki la pynkup ia ka burom ka iktiar (MLA) u ka klet bad iehbein. Ki la ong, kumba long mynta ka samoi (MLA) ka la jan kut artad ba ki paidbah kin hap ban jied ne pynthymmai ia u Nongmihkhmat hynrei haduh mynta ym shym la leh eiei.
Baroh ki jingkular ki long tang ki jingshukor bad pynbiej ia ki paidbah kumjuh ruh ia ki nongialam bad ki dkhot jong ka Mahila. Namarkata, kane ka jinglehbein bad bym leh eiei u MLA ka la pynbitar ia ki nongialam ka Mahila ha katei ka shnong ba kin mih noh na ka Congress bad pyniasoh bad ka UDP bad ki la pynpaw ruh ba kin trei borbar ban pynjop ia u kyrtong ka UDP u Bah Khraw Kupar Jyrwa ha ka elekshon ka ban sa long shen ha u bnai Rynphang mynta ka snem.
Ha katei ka sngi la donlang ruh u Bah Khraw bad kiwei kiwei ki nongialam ka UDP. Na ka liang u Bah Khraw (Kyrtong UDP ha ka elekshon 20013) u la pdiang sngewbha ia ka jingwan iasnoh jong ki nongialam ka Congress Mahila bad u la kyntu kynpham ia ki ban kin trei borbah shitrhem khnang ba ka seng kan ioh ia ka jingjop ba donburom ha u 2013.
