Shillong, Lber 19:Ka long kaba phylla ba uwei dieng kwai ula mih tnad kum kiwei ki dieng hapoh ka bri kwai jong I Kong Blossom Wahlang ha shnong Patharkhmah, Ri bhoi District.
Ym ju kham shem khoit ba u dieng kwai uba dei u jingthung ba mih bha ha ki thain Ri Bhoi bad Riwar ban iohi ne lap ba un mih tnad kum u dieng bad kane lehse ka dei ka sien ba nyngkong eh ha Ri lum Khasi-Jaintia ban iohi ba u dieng kwai uba long kum u dieng tlai un mih tnad kaba la pynlyngngoh shibun ia I kong Wahlang, ba kumno utei uwei u dieng kwai ha kper jongi u pynmih kawei ka tnad na u dieng bah katba ha kiwei kiwei ym don.
Haba iakren bad u Peitngor I kong Wahlang ila ong, ba utei u dieng kwai u la don kumba 7 ne phra snem mynta bad katei ka tnad ka la mih ha ki saw snem mynshwa kata hadien kumba saw snem eiei ba la thung ia u ha katei ka bri kwai kaba don ha syndah ka iing jong i ha shnong Patharkhmah.
“Haba nga iohi nyngkong nga lyngngoh, kumno utei uwei u dieng kwai u mih tnad katba kiwei ki long kumjuh ym don jingphylla eiei. Ia kane ka jingjia phylla nga la shu sngap shwa kumto bad ha iing ruh ngam pat iathuh iano iano ha katei ka por,” ila ong bad bynrap ba katei ka jingjia lehse ka don ha kiwei kiwei ruh ki dieng kwai jong ki briew hynrei haba ka leit ka wan ban peit ia kiwei kiwei ki dieng kwai jong ki briew kam man iohi satia.
“Nga dang pyrkhat ba ki khun ki la iohi ia katei ka jingjia, hynrei kim tip eiei haba nga kylli dei tad hadien ba nga la iathuh ia ki sa tip ia katei ka jingjia ba u dieng kwai u mih tnad.” ong I Kong Wahlang.
Halor katei ka jingjia i Kong Wahlang ila ong, ba im don kano kano ka jingsngew pher ha iing hasem watla katei ka jingjia ka long kaba phylla bad ka bym ju kham jia khoit ha ki dieng kwai.
Katei ka tnad kam don jingpher eiei tyngba ka khamrit ia u dieng bah hynrei haba peit bniah une u dieng kwai u dang shim por katto katne snem ban soh namar um da long bha kum kiwei kiwei. (SP News)
