Shillong, Nohprah 14:U nongialam jong ka seng sain pyrthei ka Meghalaya Trinamul Congress u Ashahel D Shira haba plié ia ka seng ha kane ka jylla Meghalaya u la ong ba ka seng kan pyniakhun ha ki 35 tylli ki constituency ha ka election kaban long ha u snem 2013.
Haba kren ha ki nongthoh khubor ha Shillong u Ashahel D Shira u la ong ba ka MPTC kan ai ia kawei pat ka lad na ka bynta ki paidbah jong ka jylla ha dien ba kine ki seng sain pyrthei baroh kiba don ha kane ka jylla ki la pulom namar kim shym la lah ban ai ia ka jingdon kam.
U la ong ba kumba ka long mynta ka seng NCP ha kane ka jylla Meghalaya ka la ia kynduh m,awsiang ha kaba bun na ki dkhot jong ka seng ki la mih bad leit ban pyniasoh bad ka seng NPP ia kaba la ia lam da u Purno A Sangma.
Haba phai pat sha ka seng Congress u la ong ba ka seng Congress kat dangmih ki sngi ka la dang hiar na ka daw ba ka jingiashrud para maki ban ia long heh bad ki klet noh pat ia ki paidbah jong ka jylla. Ka seng Congress ruh kumba ka long mynta ka la duh ia ka jingshniah jong ki paidbah.
Kiwei ki nongialam jong ka seng kiba la don lang ha kane ka sngi ki long u working President U Sengrak D Marak, General Secretary bah Pyntngen Lyngskor, vice president Wanshuwa Nongtdu bad organising Secretary Stevie M Sangma.(SP News)
