Shillong, Jylliew 25: Mynjur ka Sorkar ban pynkhlain bad ban pynjanai ia ka the Meghalaya Transfer of Land (Regulation ) Act 1971 bad ban pynbeit thymmai ia ka Indian Registration Act 1908, khnang ban ithuh da ka Ain ia ki dulir Khasi States, Hima/Elaka ba la ai na ka office revenue / land jong ki Syiem, Lyngdoh, Sirdar, Dolloi bad Nokma.
La donkam ban pynbeit kyrkieh ia kane ka phang da ka Sorkar Meghalaya namar kan iarap ha kaba ia kren ban pynbeit ia u pud u sam bad ka Assam, namar ki Boundary Commissions kiba mynshwa kim shym treh ban ithuh ia ki dulir khyndew jong ki khun ki hajar, ki Dorbar Raid bad na ki Dorbar Hima ha ka por ba ia pynbeit ia u pud u sam. La shu ia kren ia u pud u sam tang halor ka NE Re organisation Act 1971, bad ki notification ki ba mih katkum katei ka Act.
Ha u snem 2011, ka Meghalaya State Planning Board, ha ka jingleit tohkit ia ki Surok sha ki thain Border, ki la hiar sha Pilangkata, Killing, sha khap Assam, Jirang bad lap ba kiba bun ki paidbah kiba ha syndah bad u pud Meghalaya Assam ki hap banse ban leit register ia ki dulir khyndew bad ki DCs, Assam ba kin ioh ia ki jingdonkam kum ka card BPL, ka bording, ka um bam um dih, bad kiwei kiwei ,namar ka jingshitom bad ka jingslem ban ioh ia ki kam pynroi na ka liang ka Meghalaya namar ka jingshitom ia ki dept ban hiar bad ban poi sha kine ki jaka namar ka jingjwat ka surok katba ka long kaba suk ban wan rung na ka liang ka Assam Ka don sa kawei ka jingeh ka long ba kiba bun kibym dei Khasi ki ba la shong la sah la bun pateng hapoh u pud u sam jong ka Hima Mylliem, Hima Jyrngam, Hima Nongpoh, Hima Khyrim, Hima Nongspung, bad kiwei kiwei kim lah ban ioh dulir namar ka ain Meghalaya Transfer of Land (Regulation ) Act 1971, kaba khang ia ki Hima /Elaka ban ai dulir ia ki ba kin long ki nongshong wai khyndew, katba ka Assam pat ka ithuh ia ki kum ki trai khyndew.
Ka Sorkar Jylla ka la mynjur ban peit bniah ia kitei ki jingaijingmut. Ia kane ka rai la pyntip lyngba ka shithi na ka Joint Secretary, Chief Ministers, Secretariat, halor ka memo dated 20th May 2014, ba la phah sha u Dr Mukul Sangma, Chief Minister, Meghalaya na u Bah John F Kharshiing, Co-Chairman, Meghalaya State Planning Board(MSPB) bad Chairman, Grand Council of Chiefs of Meghalaya.(SP News)
