Shillong Naitung 22: Ka Dorbar kaba la khot da ka Synjuk ki Khlieh Nongsynshar Shnong, thain Sohra ka la long ha ka 20 tarik July 2013, hapoh office u Syiem Hima Sohra, ha kaba bun ngut ki Sirdar, Sordar bad Rangbah Shnong ka thain Sohra kiwei kiwei ki Elaka ki la poi ha katei ka jingialang. Ia katei ka Dorbar la khot ban ia kren halor ka AIN SHNONG – ka KHADC Village Administration Bill 2013. Ia katei ka Dorbar la pyniaid da u Paiem Freeman Syiem, Syiem of Hima Sohra.
Ka Synjuk Ki Khlieh Nongsynshar Shnong, thain Sohra ki la khot sngewbha ia u Bah John F Kharshiing, Chairman, Co-Chairman, Meghalaya State Planning Board; Chairman, Grand Council of Chiefs of Meghalaya, & Spokesperson, Federation of Khasi States, ban iarap pynshai halor katei ka Ain Shnong kaba la tyrwa da ki bor KHADC bad kaba la tip kum ka KHADC Village Admin Bill 2013.
Na ka liang u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pynshai ba ka por ka la ih ban ioh ia ki RITI ki DUSTUR da ka jingthoh khamtam ha kaba iadei bad ka synshar, khaddar bad ka bishar. U la ong ba ka long kaba kyrkieh haduh katta katta ban ioh ia kitei ki RITI ki DUSTUR kiba la shuh sah tang ha ka ktien ba kin ruh bad ioh noh syndon ia ka bor jong ka AIN khnang ban iada ia ka hok jong ki khun ki hajar, u la pynshai shuh shuh ba ynda la dep pynjari ia katei ka AIN SHNONG ki Shnong, Raid/ Hima/ Elaka ki lah ban nang pynjanai ba kita ki AIN kin long kiba iadei dur bad ka jinglong jong ka Riti ka Dustur jong ka jaka jong ki.
Ha kaba iadei bad ki katto katne ki jingeh kiba mih ha katei ka Bill, u la pynshai ba ki Khlieh Nongsynshar dang shen ki la leit pynpaw ia ka jingsngewkhia ka jong ki lyngba ka dorkhas sha u CEM, KHADC, bad la kyrmen ba kitei ki bor kin sa shim khia ban leh ia kaba donkam.
Hadien ka jingiatai na ka liang kiba bun, ka Synjuk ki Khlieh Nongsynshar Shnong, thain Sohra, ha kaba mynjur ia ka jingdonkam kyrkieh ia ka AIN SHNONG, hynrei ha kawei ka liang ki la shim ia ka rai ban pyrshah bad ban kyntu jur ia ki bor KHADC ba kim dei ban tyrwa lane pynjari ia ki AIN ki ban pynmih ar tylli ki bor hapoh kawei ka Shnong, ioh ba kan ialam sha ka jingiapait ia pra hapoh ki Shnong, bad kaba kham sniew ka long ba kan wanrah ia ka jingiasngew liang hapoh ki Shnong ki thaw.
Ha kaba iadei bad katei ka phang, ka Synjuk ki Khlieh Nongsynshar Shnong, thain Sohra, ki la shim ruh ia ka rai ban phah ka dorkhas sha u CEM, KHADC, ki Local MDC Shella bad Sohra, ban pynsngew ia ka rai kaba mih ha katei ka Dorbar bad ki la kyntu ia u Bah John F Kharshiing, ban iakren bad ki bor KHADC halor katei ka phang.
Kiba la ia don bad kiba la ia shim bynta ki long ki Sirdar, Sordar bad Rangbah Shnong ka thain Sohra kynthup ki Myntri, ki dkhot Executive Member Hima Sohra, bad ki Nongsynshar kiba na kiwei kiwei ki Elaka.(SP News)
