Shillong, Kyllalyngkot 15: Ka jingialang kaba kongsan kaba la long mynta ka sngi ha pdeng ka sorkar bad ki seng bhlang kumno ban wad ki lad ki lynti ban iada na ka jingwantuid jong ki mynder ri ha kane ka jylla.
Ha kane ka jingiakren bad ka sorkar na ka liang jong ki seng bhalang kila mynjur ban pynsangeh shuwa shipor ia ka jingiakhih ka jong ki katba ki dang pule bniah ia ki sanphew ar tylli ki ain kiba don ha ka Ri India kiba ia dei bad ka jingwantuid jong ki mynder Ri.
U President jong ka KSU u Bah Daniel Khyriem u la ong ia ki nongthoh khubor ha dien ka jingiakren bad na ka liang jong ki 13 tylli ki seng bhalang ki la mynjur ban pynsangeh shuwa ia ka jingiakhih ka jong ki ba kin ioh lad ban ia peit bniah ia ki 52 tylli ki ain kiba kin sa ioh kotpi na ka sorkar ha shuwa ba kin shim ia kano kano ka rai.
Kumba ka long ka jingiakren ym shym la lah ban pynkut namar ki seng bhalang ki dang ap ia ki kot ki sla na ka sorkar bad kin sa shim ia ka rai ha dien bad ki la dep ban pule bniah ia ki. Ha ka juh ka por la ong ba ka jingdawa ia ka ILP ka dang neh haduh mynta.
Kane ka dei ka jingialang kaba nyngkong ha dien saw bnai ba ki la ia kynduh ha u snem ba la dep. Na ka liang jong ki seng bhalang ruh kin dang ia shong pyrkhat ha kaba ia dei bad kane ka kam la ong u Bah Daniel.
Ha dien ka jingiakhih kaba la neh saw bnai lynter na ka liang jong ki seng bhlang ki la pynsangeh ia ka jingiakhih ka jong ki ha dien ba ka sorkar ka la khot ia ki sha ka jingiakren ban wad ki lad ki lynti kumno ban teh la kam ia ka jingwan tuid jong ki mynder Ri.
U President jong ka Federation of Khasi-Jaintia and Garo People (FKJGP)u bah Joe Marwein, u la ong ba wad la ki seng bhalang kin dang ia peit bniah ia ki ain hynrei kim pat weng ia ka jingdawa jong ki ba dei ban pyntrei kam ia ka ILP ha kane ka jylla.
U myntri rangbah ka jylla u Dr Mukul Sangma u la ong ba ka phang pdeng jong kane ka jingiakren ka long kumno ban wad ki lad ki lynti ban iada na ka jingwan jong ki mynder ri ha kane ka jylla bad kane ka jingwad ia ki lad ki lynti kan long da kaba ia mon lang na baroh na ka bynta ka jingbha ia ka jylla.
U myntri rangbah u la ong ba na ka liang jong ki seng bhalang kila ai ka jingmynjur ka jong ki ba kin dang ia pule bniah ia ki ain kiba ka sorkar ka la dep ban pyni ha ki. Kane ka jingiakynduh ka long kaba seisoh bad kane kam iarap na ka bynta ban iaid sha khmat kumno ban pynurlong ia ka jingda na ka jingwan jong ki birew kiba na bar.
U Dr Mukul u la ong ba ynda kit and sorkar bapher bapher ki la dep ban pynbiang ia ki ain baroh yn sa phah sha ki seng bhalang ba kin pule ia ki khnang bay n dup lah ban ia poi ha kawei kathong kata ka long ban iada na ka jingwan tuid jong ki briew kiba na bar sha kane ka jylla la ong u Dr Mukul Sangma.(SP News)
