Shillong, Jylliew 15: U Chancellor jong ka CMJ University U CM Jha mynta ka sngi u la phah ia ka shithi jingpynshai ka jong u na ka jaka rieh sha u myntri rangbah ka jylla Meghalaya u Dr Mukul Sangma bad sha baroh ki myntri ka jylla, ha lor ka jingbthah jong u Lat ka jylla ban phah tohkit noh sha ka CBI lada ka CID ka shem jingeh ban leh ia kane ka kam.
U Jha u la phah ia kane ka shithi jingpynshai sha u muktiar jong u u SP Sharma ban ai ia kane ka shithi kaba san sla sha u myntri rangbah ka jylla bad sha ki myntri ka sorkar jylla. Ha kane ka shtihi la thoh halor ki jingkynnoh jong u lat ha kaba ia dei bad katei ka University.
Na ka liang jong u Advocate SP Sharma haba kren ha ki nongthoh khubor mynta ka sngi u la ong ba u dei tang u muktiar jong u Jha bad ym dei u ba ioh ia ka tulop na kane ka University ka kam jong u ka long ban leh ia kaei kaba la phah ha u bad ka kam jong u ka long tang ban ai ia kane ka shithi sha ki bor jong ka sorkar jylla.
Haba la kylli sha phang u Jha na ka liang jong u advocate Sharma u la ong bay m don jingtip sha ei u don bad ia kane ka shithi ruh la phah da ka email sha u ban ai lem sha ki bor ba dei ban ai ia ka. Haba la kylli ba lei u Jha ukiar ia ki bor jong ka ain, la ong ba katba dang don ki lad ki lynti ban iada ia lade na ka ain hap ban wad haba la kut ki lad baroh yn sa wan ban aiti ha ka ain.(SP News)
