Shillong, Jylliew 09: Da ka jingthmu ban iarap ia ki nongrep na ka bynta ban tip kumno ban sumar ia ki jingthung jingtep ha kaba poi ka iaptram lane ia iap khlam ka Media Lab Asia rygnkat bad ka Central Agricultural University ka la plie ia ka jingai jingtip sha phang ka rep ha Umiam ha kaba ki nongrep ki lah ban shu phone ban ioh ia ka jingbthah ha kaba ia dei bad ka rep ka riang lada don kino kino ki jingeh.
Ka jaka pule ha kaba ia dei bad ka rep ka riang kaba don ha Umiam ka la sdang ia kane ka jingpyntrei kam da ka juk stad kaba thymmai ha kaba ki nongrep kim don kam shuh ban leit sha ki ophis ban wad jingtip haba ka don kano kano ka jingjulor ha karep ka riang ki lah ban shu phone bad yn batai ia ki ha ka ktien kaba ki kren.
U Dr TS Anurag, u ba dei na ka Media Lab Asia haba kren ha ka jingialang ha ka sngi plie ia kane ka buit thymmai kumno ban iarap ia ki nongrep ha kane ka jylla Meghalaya u la ong ba ki nongrep mynta tang da ka phone ki la lah ban pan jingpynshai ha kaba ia dei bad ka rep ka riang lada ka don kano kano ka jingeh.
Ia kane ka rukom ai jingtip ia ki nongrep ia kaba la plie thymmai la tip kum ka “Interactive Information Dissemination System (IIDS)” da kane ki nongrep kin ioh ia ka jingpynshai ha kaba ia dei bad ka jingdon kam jong ki nongrep naki briew kiba la nang la stad ban hikai ia ki da kaba ia kren lyngba ka phone.
Ha kaba sdang yn shim ia ki 5000 ngut ki nongrep na kane ka jylla Meghalaya bad kita ki long na East Khasi Hills, Ri Bhoi bad West Garo Hills, kane kan long kum ka jingsdang. Ia kane ka project la plie da u Secretary ka Department of Electronics and Information Technology, Ministry of Communication and Information Technology jong ka sorkar pdeng.(SP News)
