Shillong, Kyllalyngkot 21: U Dr Jemino Mawthoh MLA jong ka UDP mynta ka sngi u la ai ia ka memorandum ha u president jong ka Ri India u Pranap Mukherjee bad ha u myntri kam poh iing ka Ri India u Sushilkumar Shinde halor ka jingkynnoh ba ka don ka jingiadei hapdeng ki lehnoh bad ki politician ha kane ka jylla Meghalaya.
Haba kren ha u SP News Agency lyngba ka phone na Delhi u Dr Mawthoh u la ong ba ha kane ka jingiakynduh u president bad u myntri kam poh iing jong ka Ri ki la shah skhor ia ka jingujor jong ka seng UDP.
Ha kane ka jingiakynduh kila dawa ba dei ban phah tohkit ia kane ka jingkynnoh ba ka don ka jingiadei hapdeng ki lehnoh bad ki nongialam seng sain pyrthei ban lap ia ka jingshisha baroh.
Nalor kitei ar ngut ki la ioh ban ia kynduh ruh ia u president jong ka BJP bad ia u ba dei peit ia ka dong shatei lam mih ngi jong ka Ri India. Ha kane ka jingiakynduh la ia kren ia bun ki kam kiba ia dei bad ka Noth East.(SP News)
