Jowai, Lber 10: Ka Jaintia Students Union, hadien ba ka la ioh ia ki jingujor na ki khynnah skul bad ki kmie ki kpa jong ki khynnah jong ki hynriew tylli ki Upper Primary School hapoh ki hynriew shnong jong ka Ri Lum Jaintia kiba la pynkiew kyrdan sha Secondary School lyngba ka RMSA (Rashtriya Madhyamik Siksha Abhiyan) nalor ba kim don iaki nonghikai, ki dang don shibun ki jingduna.
kine ki hynriew tylli ki skul Sorkar kiba la pynkiew kyrdan sha ka Upper Primary School naduh bas dang jong u snem 2013 ki don ha ka shnong Jwai , Shangpung, Mynso, Mowkaiaw, Sutnga bad shnong Saipung.
kumta ka seng da ka mynsiem kaba sngewkhia na ka bynta ka jingbha bad ka jingnang jingstad kala tokit mardor ia kine ki jingujor da kaba leit jngoh ia katto katne tylli kine ki skul bad la lap ba ha u snem 2013 la pynkiew kyrdan ia kine ki skul lyngba ka skim RMSA da kaba sanction haduh 7tylli ki post nonghikai, hynrei ha u snem 2013 ka Sorkar kam pat lah ban thung wat tang uwei ruh u nonghikai wat lada iaka Interview na ka bynta kine ki post la dep pyllong naduh 10 June 2013 bad ki khynnah skul kila shem lanot namar iaki subject baroh la pynkit jubor ha ki nonghikai UP.
Tad haduh une u bnai bala dep (February) ka sorkar lane ka tnad ba dei peit iaka pule puthi ka dang thung tang uwei/kawei, u/ka nonghikai ha kawei kawei ka skul katba ha Saipung haduh mynta ym pat thung wat uwei ruh u nonghikai, kane ka jingleh jong ka sorkar ka lah ktah jur ia kajingnang jingstad bad ka lawei jong kine ki khynnah ha kine ki skul.
Kaba kham phylla ka long ba katkum ki jingtip ba la iohlum la ong ba ha kiwei pat ki skul kiba la pynkiew kyrdan ha kiwei pat ki district jong ka Jylla la lap ba ladep thung haduh saw ngut ki nonghikai ha kawei pa kawei ka skul naduh u snem ba la dep kiba don ha Rilum Khasi bad Garo katba ha Jaintia Hills pat kine ki skul kila shah ieh khunswet.
Ki Nongmihkhmat bad ki heh sorkar ki ong ba “Ki khynnah skul ki lon ka lawei jong ka Ri” tangba katkum ba ka long mynta ka long markhongpong. Kumta ka seng ka dawa na ka Sorkar bad ka tnat pule puthi ban thung noh ia kine ki nonghikai la kumno kumno saw ngut ha man la kawei pa kawei ka skul (ar ngut na ka science stream bad ar ngut na ka arts stream) hapoh hynniew sngi bad kumjuh ban tei noh ia ki Classroom bad ka Laboratory ha baroh kine ki skul kaba long kawei na ki jingdonkam jong ki khynnah katkum ka course jong ka MBOSE kaba mynta bad lada ka sorkar kam lah ban leh ia kane ka Seng hi kan sa hap ban shim da kiwei ki lad na ka bynta ka jingbha jong ka pule puthi bad ka lawei jong ki khynnah pule la ong ka seng JSU.(SP News)
