Shillong, Kyllalyngkot, 08: Ka jingbym shimkhia jong ka Shillong Cantonment Board (SCB) ban leh matlah bad leh bym salia ban pynkhuid pynsuba ia ki katto katne ki jaka kiba hap hapoh u pud u sam ba ka la aiwai ha Iewduh ka la wanrah pynban ka jingmynsaw ia kiba bun ki nongleit Iew leit hat bad kiba iaid baieng.
Ki paidbah nongleit nongwan kiba ngat bunsien ha kane ka jingjaboh ki la mad ia ka jingsyrtok kaba khraw bad ka jingkordit namar ban kiar ia ki kali kin hap ban iaid nalor kane ka jaboh ka jabain.
Ki nongdie dukan kiba shongdie madan ha pyrshah ka Parking Lot jong ka MUDA ha them metor ki ong, ‘a nala kaba wan tuid na shaneng ka dukan die sha jong ka Sarmistha Dairy ka la kylla long ka ahor ktieh kaba isaitmet shisha. Bun ki nongiaid lynti kiba la shahriam ha kane ka ahor ktieh.
“Naduh ba ka Shillong Cantonment Board ka la pynpra ia kawei ka dukan Team, ki jaboh jabaiñ kiba wan tuid na kane ka nala ki la sahkut lut hajuh bad manla ka sngi bun ngut ki briew kiba iaid lynti ban kiar ia ki kali ki ngam ha kane ka ahor haba ki iuh nalor ka jaboh ong kine ki nong die dukan.
Ki nongdie dukan ki la pynpaw ba ka Shillong Cantonment Board kam ju wan pynkhuid satia hynrei ka wan lum tang ia ka bai wai bad ka bai dukan.
Namar ka jingsahkut jong ki nuit ki nier bad ki jaboh khamtam ki plastik, ka la pynlong ia ka um kaba wan tuid na kane ka nala ban tuid sha surok ha kaba ki kali bad ki paidbah nongleit nongwan ki hap ban iaid kynjing nalor ka nala.
La lap ruh ba ka jingsahkut jong kane ka nala ka long ruh namar ka jinglang jong ka jaboh kaba isaitmet haduh katta katta ha lyndet jong ka lynti rung sha ka Parking Lot jong ka Meghalaya Urban Development Authority (MUDA), kaba don hajan ka Them Metor. (SP News)
