Shillong Risaw 08: U General Secretary ka Khasi Students Union u samla Auguster Jyrwa ula pynbna ba kala don ka jingiakynduhlang kaba kyrkieh jong ki 13 tylli ki sengbhalang hynne ka sngi bad kane ka jingialang da kawei ka sur kala rai ban pynsangeh shwa shipor ia ki jingiakhih namar ka jingkyrpad jong ki niam bapher bapher ban rakhe ia ki jinglehniam lehrukom ha kane ka jylla.
“Ngi la rai ba naduh ka 10 tarik haduh ka 16 tarik ngin nym pynlong ia kino kino ki prokram jingiakhih kum shi bynta ban burom ia ki niam bapher bapher kiban pynlong bad rakhe iala ki jinglehniam lehrukom kaba shisien shi snem bad ula ong ruh ba ki nongialam jong ki sengbhalang kin sa iakynduh biang ha ka 16 tarik ban pynbna ia ki prokram jingiakhih ban pynbor ia ka sorkar jylla ban pyntreikam noh mardor ia ka(Inner Line Permit) ILP ha ka jylla” la ong u Aguster Jyrwa.
Shuh shuh ula ong ruh ba ki 13 tylli ki seng kiba kynthup ia ka KSU,FKJGP,GSU, HNYF, RBYF,JYF,JSU,AJYWO,CSWO,
“Ngi kyntu jur ia u Myntri Rangbah ka jylla u Dr Mukul Sangma ban pyntreikam noh ia ka ILP bad ngim shym la dawa ban pyntreikam ia ka Tenancy Act, haba ngi pan ia ka dohsyiar u ai pynban da ka Pashor kait bad kane kam long kaba lah ban pdiang bad ka sorkar kadei ban pyntreikam beit da ka ILP ban iada ia ka ri bad ka jaidbynriew na ka jingwan rung kyrthep ki myneri ri bad ki bar jylla” la ong u nongialam ka KSU.
U General Secretary ka KSU ula ong ruh ba lada pyntreikam ia ka ILP ha ka jylla kan nym don satia ka jingshah ktah ha ka ‘Tourism’ ne ha ka kam jngohkai bad kiba pynsaphriang ba lada pyntreikam ia ka ILP kan ktah ia ka kam jngohkai kadei tang ka buit ban ialam bakla bad pynsngewthuh bakla ia u paidbah ka jylla. Bad ula ong ruh ba naduh ba ka jylla Meghalaya kala ioh iala ka jylla kaba pura mynta la bun snem, watla ym pat pyntreikam ia ka ILP hynrei kam shym la don ka roi ka par hynrei lyngngoh pat ban iohi ba ka roi ka par kadei tang ka jingwan buhai shnong jong ki poiwir ha ki sor bad khapsor bad hato ngi lah ban pdiang ia kane, la buh jingkylli une u nongialam.
“Ka sorkar kadei ban pynthikna shwa nyngkong, ki mynder bad ki bar jylla ki wan nangno, ki wan na ka daw aiu sha kane ka jylla bad kam don jingmut ban ailad shwa ia ki ban rung katba hap iit pat ia ki hadien ban kylli jingkylli ne tohkit ki wan leh aiu sha kane ka jylla” la ong u samla Aguster Jyrwa.
Nalor kane ula kyrpad ruh ia ki paidbah ban bteng ban ai ia ka kti kamon kti kadiang ban kyrshan ia kane ka jingiakhih khnang ba ka jingdawa jong ki sengbhalang kan urlong bad ula ong ruh ba ka ishu ILP kam dei tang na ka bynta ki sengbhalang hynrei ka dei na ka bynta ka bha ka miat jong ka ri bad ka jaidbynriew hi baroh kawei. Une u nongialam ula iawe ria ki paidbah ka jylla ba kin bud lem ia ki nuksa jong kiwei pat ki jylla ha kaba ki paidbah ki mih shakhmat ban dawa na ka sorkar iala ka hok.(SP News)
