Shillong, Rymphang 06: Ki kyrtong ki ban ia khun ha kane kaelection MDC ka ban long ha ka 24 tarik mynta u bnai ka la pynlong iakiba bun ki paidbah ban peit kum kino ki kyrtong kiba don ka jingiadei kaba jan bha bad ki la ka long ha kano kano ka jinglong ne ka sap.
Ha kane ka kynti bad ka snem kaba mynta la iohi ba ym tang ki hehspah, ki nongkhaii ne kiba la long lypa ki nongmihkhmat kiba la shim ia ka rai ban mih shakhmat ban ia khun ha kane ka election hynrei ha kane ka kynti kaba mynta ruh la mih sa u wei pat u kyrtong uba na Nongskhen Constituency uba ia ka sap rwai u ban iakhun ha kane ka election kata u Bah Anthony Kongwang uba long uwei na ki kyrtong uba ki paidbah ki la tip wat la dang don ruh ki bym pat ithuh satia ia ka durkhmat.
Haba la ioh ban iakren bad u Bah Anthony Kongwang mynta ka sngi uba long u Kyrtong na Nongskhen Constituency na ka seng Congress hadien ba u ladep thep ia ka kyrteng hapoh ka Ophis u Deputy Commissioner ka East Khasi Hills District u la iathuh ba u la don ia ka jingthmu naduh ki por kiba mynshwa ban long kum u nong mih khmat ia ki paidbah.
“Wat la nga don ia ka sap ha ka rwai ka siaw, hynrei kane ka plie lad ruh ia nga ban shakri ia ki paidbah bad ka kam rwai ruh kadei kawei naki kam ban shakri paidbah,” ong u Bah Kongwang da kaba bynrap ruh ba la slem u la shakri ia ki paidbah da ki sur jingrwai, hynrei thrang ban shakri ia ki paidbah da kaba rung ha ka kam sain hima sima kata ban iasaid hapoh ka iing Dorbar ha District council.
U bah Anthony u la ong ruh ba ka jingkwah jong u ban iakhun ha kane ka election ka long hadien ba ula iohi ia ki jingjynjar bad sahdien jong ki paidbah ha kane ka thaiñ la ka long ha ka surok bad kiwei pat ki lad pynroi.
Haba kylli kaei kaba pynlong ia u ban jied ia ka seng Congress ban iakhun ha kane ka election, ula ong ba ula iohi ia ki matti jong u Bah Prestone Tynsong MLA ha ki kam shakri paidbah, kaba la pynlong ba unjied ia ka seng ban bud ia ki nuksa jong utei u nongialam.
“Ka jingiakhun jong nga ha kane ka election ka long hapdeng ki arngutki kyrtong kata ka Kong Grace Kharpuri, ka MDC ba mynta na ka seng HSPDP, ka Kong Banalari Khongwar na ka Seng UDP bad khlem artatien nga don ka jingkyrmen ban jop ha kane ka election namar ka jingkwah bad ka jingieid jong ki paidbah,” ula ong ruh da kaba kyrpad ia ki paidbah bankyrshan lem ha kane ka election da kaba pynjop donburom ia u bad kumjuh ruh ia ka seng kaba ula ieng.(SP News)
