Shillong, Rymphang, 08: I Kong Banalari Khongwar, iba la mih ban iakhun ia ka elekshon MDC 2014 sha ka Khasi Hills Autonomous District Council (KHADC) na Nongshken Constituency i la pan ka jingkyrshan kaba radbah na ki paidbah.
Haba kren sha ki nongthoh khubor hadien ba ladep thep kyrteng hynne ka sngi, kane ka longkmie kaba long ka kyrtong jong ka United Democratic Party (UDP) ka la ong, “ka rukom synshar paidbah ha kine ki por ka la hiar arsut bad syntuid noh katba nang iaid ki sngi. Ngi la shah iuhroit kum ki trai ri trai muluk haba baroh ki liang. Ki bor synshar ki Autonomous District Council haduh ka Sorkar Jylla, ki la sdang ban iuhroit pynban ia ka hok longtrai jong ngi ki paidbah, kum ka jingiuhroit ia ka hok longtrai ha ka khyndew ka shyiap, ka jingiaid lait bad niewbein ia ki bor synshar shnong synshar thaw, ha ka khaii ka pateng bad ha baroh ki liang. Ngi la kylla long ki mynder ha la ka ri lajong. Nga sngewkhia ia ka jinghiar hor jong ka synshar ka khadar mynta.”
“Ki paidbah ki la ngiah bad ki la kdang, ki la jlep ban leit thep vote, namarba manla ki kyrtong ba ki pynjop kim lah satia ban wanrah satia ia ka jingkylla kumba la angnud bad khmihlynti da u paidbah ba bun ba lang,” i la ong bad bynrap, “ka thong hi kaba nga don ka long ban wanrah ia ka jingtreikam kaba shai khlem da buhrieh na ki paidbah ne iaid lait ia ki shnong ki thaw ha kaba ngan ai ka jingiatreilang bad ki Seng ne ki kynhun kiba don ia kajuh ka thong ban kyntiew ia ka ioh ka kot bad ka roi ka par ha ka shnong ka thaw.”
Kum ban shu kdew hangne i Kong Banalari i la mih ban iakhun ia ka elekshon MDC ha u snem 2009 na Nongshken Constituency bad ia ka MLA election na Pynursla Constituency na ka UDP. ). (SP News Agency)
