Shillong Naiwieng 20: Ka National Security Board ha ka jingwan jngoh ia kane ka jylla ha kine ki ar sngi ka la ia kynduh ia shibun ki khraw pyrkhat jong ka jylla bad ia ki seng bhalang ban ia kren kumno ban wanrah ia ki lad jingiada ha kane ka thain.
Haba kren ha ki nongthoh khubor ha dien jong ka jingialang u la Chairman jong ka NSB, u Naresh Chandra u la ong ba ha ka jingiakren la sngewthuh ba bun ki kwah ba dei ban pynkhlian ia ka jingiadei bad ka Ri Bangladesh khamtam ha ka khaii pateng.
Ha kane ka jingialang na ka liang jong u Chairman ka NSB u la ong ba ka India ka dang wad ki lad ki lynti kumno ban ioh iaid ki jhad na ka thie ka Ri Bangladesh sha ki thain jong ka jylla Assam. Lada ioh ia kane ka lad kan iarap shibun ha kiba bun ki bynta.
Haba ia dei bad ka the Armed Force Special Power act, la ong ba ha ka jingiakren bun na ki khraw pyrkhat ki ong ba dei ban wanrah ia ka jingkylla ha kane ka ain lane dei ban weng noh ia ka. Ha kane ka bynta na ka liang jong u Chairman jong ka Board u la ong ba ka jingwan ka jong ki ka long ban sngewthuh ia ka jingmud jong ki paidbah.
Na ka liang jong ka Board kan rah ia kine ki jingiakren baroh sha ka sorkar pdeng ban pynsngew ia kaei kaba ki briew jong kane ka thain ki don ban ong. Ha kane ka jingwan jong kane ka Board sha kane ka dong shatei lam mih ngi jong ka Ri India ka la ia kren ruh shibun ki kam kumno ban kyntiew ia kane ka dong bad ka thain ha ki liang baroh.(SP News)
