Shillong, Nailur 15: u samla Fredrick Kharmawphlang u la ong ba ki sengbhalang ki 
ieng ban dawa ia u Myntri Rangbah ka jylla u Dr Mukul Sangma ban hiar shuki noh kumba dawa kiwei pat ki seng sain pyrthei, une u samla ula ong ba ki sengbhalang da kawei ka sur ki dawa na ka sorkar ba kadei ban pyntreikam noh mardor ia ka Inner Line Permit (ILP) ha baroh kawei ka jylla bad kim ieng ha kano kano ka nongrim ban dawa ba u Dr Mukul udei ban hiar shuki.
“Ka jingiakhun ka jong ngi ka long ban dawa ia ka sorkar ban pyntreikam ia ka ILP ym ban dawa ia u Myntri Rangbah ban hiar shuki noh” ong u Vice President ka KSU.
Une u nongialam ula ong ruh ba kum u lakam ban teh ban pyrkhing ia ka jingwan rung laitlan ki mynder bad ki bar jylla, ki para ri kidei ban sngewthuh ba ka jinglong trai ri ki trai jylla kam slem shuh ban duh noh lada ngin shu ia khnium, hynrei shah shitom bad mih shakhmat ban ieng hha kawei ka nongrim ba ngi kwah ia ka ILP ban treikam noh mardor ha ka jylla.
“Ngin weng ia ka sang bad ka ma kaba la sohkyrdot lah bun snem hapoh ka jylla ban poi sha katta ka thong kadei ka jingieng tylli jong baroh u paidbah ka jylla” la ong u samla Fredrick Kharmawphlang.
Shuh shuh ula ong ruh ba ki sengbhalang kin nym kynran dien katba ka sorkar kam pat pyntreikam ia ka ILP bad ula iawer ia baroh ki dkhot jong ki sengbhalang ban mih khlem jingtieng haduh ban da ioh ia ka jingjop.
“Ai kan jia katba jia hynrei ngin ieng skhem ha ka nongrim ba ka sorkar kadei ban pyntreikam noh ia ka ILP” la pynkut u Vice President ka KSU.(SP news)
