Jowai, Rymphang 02: Ha ka jingiakynduh jong ki saw seng ki ba kynthup ia ka AJYWO Sengkmie, KSU- Jaintia Hills District Unit, HNYF-East Jaintia Zone bad ka FKJGP Khliehriat Circle, mynta ha kane ka sngi Saitjain ba la dep, kitei ki saw seng ki la rai da ka wei ka jingmut ba kin peit shi taiew naduh ba la pynbna ia kane ka kyrwoh ha ki kot khubor la ka sorkar kan maramot ne em ha ka rukom ka ba dei bad ruh kat kum ba la ia kren bad ka sorkar ia ka surok NH 44 ne kan shu leh tang dep kumto.
Kum ban shu pynkynmaw ki saw seng kiba kynthup ia ka AJYWO, KSU, HNYF bas ka FKJGP, dang ha kine ki khyndiat sngi ba la dep, ki la pynlong jingiakhih da kaba khot da ka Pakhang surok Miet kaba 2 miet lynter ban pynbor ia ka sokar ban maramot noh ia u surok NH 44 kaba la sniew palat naduh Mookyndur haduh Malidor.
“Kat kum ba ka long mynta, hadien ka jingiakhih jong ngi kum ki saw seng, ngi la iohi ba ka sorkar mynta ka la sdang ban maramot malu mala ia ki bynta ba la sniew palat jong ka surok NH 44 kum ha ka thain Khliehriat bad Tuberkmai Shnong kat ba ia kiwei kiwei pat ki bynta ba la sniew palat jong u NH 44, ka sorkar kam pat shym la leh ei ei haduh mynta,” ong u Bah MH Dkhar President ka AJYWO Sengkmie.
U Bah Dkhar u la ong shuh shuh da ka ba ong ba wat la da ka sorkar ka la sdang ban leh kumne ruh hynrei na ka liang jong ki saw seng, kin ym shnong kli kti satia hynrei kin iai bud dien ia kane ka jingleh jong ka sorkar ban maramot ia katei ka surok la ka long ne em kaba pynhun ia ki bad ruh ia u paidbah bad ruh la ka long ne em kat kum ba la ia kren ha ka jingialang ha office treikam jong u Deputy Commissioner ka East Jaintia Hills District ha kine ki khyndiat sngi ba la dep.
“Ngi ki saw seng ngi long kiba la pynkhreh ban iakhih biang da ka ba tyngeh ha kano ka no ka por lada jia ba ka jingmaramot ia u NH 44 kam iaid beit iai ryntih lane kam long kaba pynhun ia ngi kat kum ba la ia kren. Kumta ngi kyntu iaki paidbah baroh ba kin long kiba iaishah shipor bad ngi bad ruh ba kin long ki ba la pynkhreh namar ka jingiakhih ka lah ban jia biang ha kano kano ka por lada jia ba ka sorkar ka ialeh kai bad ki mat jingdawa jong ngi ban maramor ia baroh ki bynta ba la sniew jong ka NH 44 naduh Mookyndur haduh Malidor.” bynrap shuh shuh u Bah M H Dkhar.
Ha kajuh ka por ki saw seng ki ai khblei bad ruh sngewnguh ia baroh ki paidbah, ki sengbhalang bad ruh khamtam eh ia ka SRS-East Jiantia Hills bad ruh ia ki 9-Shnong na Elaka Narpuh namar ka jingkyrshan pura jong ki ia ka jingiakhih jong kitei ki saw seng ha kane ka por ba la dep kat haduh ba ka la long kaba jop.(SP News)
