Shillong, Kyllalyngkot 25:Ha ryngkat bad ka Ri baroh kawei ka jylla Meghalaya ruh kala dep ban pynkhreh ban rakhe ia ka republic day kaba 64th ha madan Polo la shai ka sngi, ha kaba u lat jong ka jylla yn sa kyntiew ia ka lalam jong ka Ri India.
Na ka liang jong ki bor ba dei peit ia ka District administration kila pynlong ia ka jingpeitngor ba peit ba kane ka jingrakhe ia kane ka sngi kaba khraw kan long kaba iaid beit iaid ryntih khlem da don kano kano ka jingpynthud.
Na ka liang jong ki pulit kila pynlong ia ka jingkhynra ia ki kali kiba iaid ba ieng khatam ia ki kali kiba rung ha kane ka nongbah Shillong na baroh ki liang ban peit ba ki dkhot jong ka seng HNLC kim dei ban ioh lad ban thaw jingkulmar.
Ha ka juh ka por na ka liang jong ka sorkar kala kyrpad ia ki paidbah ba kin sngewbha ban ia mih paidbah ban leit ia shim bynta ha ki jaka rakhe ia kane ka sngi kaba khraw ba dei ha kane ka sngi ba la ioh ia ka riti synshar jong ka Ri.
La kyntu ia ki paidbah ba kim dei ban shah skhor ia ka jingkhot pakhang shnong jong ka seng HNLC ka seng kaba la niew beain da ka sorkar.(SP News)
