Shillong, Risaw 07: Ha ka sein kaba nyngkong ia lum lang palat spah ki Nongai
dawai Kynbat/ Ki Nongkhem/ Ki Nongpynkhakhun, na ki 23 tylli ki Shnong kiba hapoh u pud u sam jong ka Hima Nongspung, kiba long ki dkhot ka Society for Promotion of Indigenous Knowledge and Practices (SPIKAP). Ia kane ka jinialang la pynlong ha ka sngi saitjain, ha poh shnong Madan Bitaw, Hima Nongspung, Mawphlang C&RD Block, East Khasi Hills District ban ia kren halor 1. ka jingdonkam ban ithuh da ka ain ia ki nongaidawai kynbat ki nongkhem bad khamtam ia ki Nongpynkhakhun (Nurse) khasi. 2. Ka Act ‘The Khasi Hills Autonomous District (Protection and Promotion of Khasi Traditional Medicine) Act, 2011’. bad 3. Ka jingdonkam ban ai jingiarap ‘honorarium’ ia kine ki ‘Nurse Khasi’
Ia katei ka jingialang la pynbit pynbiang da u Bah Kyntiewborlang Syiemlieh, President, bad ki nongkitkam, Seng Samla Hima Nongspung ha ryngkat ka jingkyrshan lang u Bah M Rani, Acting Chief, bad u Bah D Syiemlieh, Secretary, kynthup ki Sordar Shnong, bad ki nongkitkam Hima Nongspung.
ki Nongaidawai Kynbat/ Ki Nongkhem/ Ki Nongpynkhakhun, ki la wan ia lum lang ha ka sien nyngkong na kylleng kynthup na ki Shnong Madan Bitaw, Laitnongrem, Dempluh, Lawkhla, Pyndenlitha, Mawkneng, Wahlang, Mawkynjing, Laitnongrim, Laitkajaud, Laitdithuh, Mawsniang, Nongspung, Wahsholait, Lailyngkhoi, Madan Lyngkhoi, Mynjer (Nongspung), Mawsadeng, Lempluh, Laijithoh, Mawjongka, Kyndong Wahlang, bad Nongwah Lynnia, ki la pynpaw ia ka jingkmen ba ia kynduh lang baroh kiba ia don ha ka juh ka kam, bad ki la rai ban ia treilang ryngkat na ka bynta ka jingkiew, ka jingpynjanai, ia kane ka rukom sumar tynrai.
Ha katei ka jingialang, u Bah John F Kharshiing, Co-Chairman, MSPB, bad Chairman, SPIKAP, u la ai khublei ia ki Nongaidawai Kynbat/ Ki Nongkhem/ Ki Nongpynkhakhun, bad u la ong ba ka Sorkar ka la dei ban ai jingiarap kaba kyrpang ia ki nongsumar tynrai kum shibynta ban ai khublei ia ki ia ka jingshakri treimon sngewbha jong ki ha ki shnong kyndon kiba jngai na ki Hospital Sorkar.
U la ai khublei ia ki bor Sorkar bad ki bor Khasi Hills Autonomous District Council kiba la thaw ia ka ain (Act) kaba kyrteng ‘The Khasi Hills Autonomous District (Protection and Promotion of Khasi Traditional Medicine) Act, 2011’kaban ithuh ia ki bad la kyrmen ba ki Rule kin sa mih hashen na ka bynta jong ki.
U la ai khublei ia ki nongpynkha khun namar khlem ka jingiarap jong ki ym tip shuh ai kan jia ia ki paidbah. U la kyrpad ia ka jingiatrei lang baroh ban ioh ia ki jingithuh na ki bor Sorkar bad ki bor District Council.
U la kyntu ia ki Doctor Sla ba kum ki nongsumar da ki kynbat , nongpynkha khun ba ki dei ban buh ar tylli ki kawei ka register kyrteng jong ki paidbah kiba ki sumar, bad sa kawei ka dei ka register ba ai dawai ki dei ban thoh katno sien phah dih dawai, katno bnai ki sumar, ter ter.
U la ong ‘kumno phi khleh dawai ka long ka jingstad jong phi kaba phi lah ban burieh’, hynrei kaba shyrkhei mynta ka long ba ki kynbat la sdang dun bad ioh ba ki duh jait, phi donkam ban wanrah ia ka dur bad ka kyrteng jong u kynbat sha ka office SPIKAP, khnang ban ioh lum thup ban khmih bad peit ioh ba ki duh jait.
Naduh Ri phareng ki briew ki wan wad ia ka jing sumar da ki kynbat, hynrei kaba eh ka long ba ki nongsumar tynrai kim pat biang ka jaka thiah, ki jaka leit shabar, kim pat ia kren hapoh ki Dorbar Shnong, ban shah ia kiba nabar ban wan shah sumar hapoh Shnong jong ki. U la pynshlur bad kyntu ia ka Seng Samla Hima bad ia ki bor Hima ba kin shim ka lad ban iada ia ki khlaw Shnong, kum shibynta ban iada ia u kynbat uba baroh ha katei ka jingialang ki la ud ba la nang shitom ban ioh ia ki sla kynbat dawai kiba donkam bh
Na ka liang ka Seng Samla Hima Nongspung, ki la ai khublei ia u Bah John F Kharshiing, Co-Chairman, State Planning Board, & Chairman, SPIKAP uba la wan ban ai jingpynshai halor kane ka phang bad ki la kyrpad ruh ia u ban thaw lad kumno ban ioh sumar ha ki CHC, ki PHC, lane ban ioh ruh ia ka jaka sumar ka jong ki nongsumar da ki dawai kynbat Khasi
Kiwei kiba la ia kren bad kiba la ia don lang ki long u Bah Kyntiewborlang Syiemlieh, President, bad ki nongkitkam, Seng Samla Hima Nongspung, u Bah M Rani, Acting Chief, u Bah D Syiemlieh, Secretary, Bah S Nongbet, Jt Secy Hima Nongspung, bad kiwei kiwei ki nongkitkam Hima Nongspung. (SP News)
