Shillong, Jylliew 09: Ka sorkar Meghalaya ka la pan jingbit na ka sorkar pdeng ban pyniakhlad ia ka jingtrei kam jong ki pulit ha ki ar bynta, ban tohkit bad ban trei ia ka kam pulit kaba man ka sngi.
Na ka liang jong ka sorkar ka sngewthuh shai kdar ia ka jingkhia jong ka kam ki pulit kiba don ha ki thanad bapher bapher ha kane ka jylla namar ki hap ban trei ia ki kam kiba man ka sngi bad ha ka juh ka por kihap ban tohkit ruh ia ki jingjia kiba na ka por sha ka por.
Kumba ka long mynta bun na ki sabut kaba la ai da ki pulit ha ki iing bishar ha kaba ia dei bad ki kam runar kiba ha rukom ki long kiba tlot dei na kane ka daw ba sa duna ka jingshah rai pynrem jong ki nongleh kam sniew.
Ka sorkar ka tip bha ia kane, ka kong Roshan Warjri myntri kam poh iing ka jylla ka la trei shitom ban pynkohnguh ia ka sorkar pdeng ba kan pdiang ia kane ka jingtywa na ka sorkar jylla khnang ba ka jingtohkit kan long kaba khlain ha kaba yn lah ban pynshitom ia ki nongleh kam sniew. Kumba ka long mynta ki juh ki pulit kiba hap ban trei ia kam kaba man ka sngi kim lah shuh ban pynleit jingmud ha ka jingthoh kit.
Lada ka sorkar pdeng ka pdiang ka sorkar Meghalaya ka hap ban shna shibun tylli ki post hapoh ka police department namar kan dong ka jingduna briew ban trei ia ka kam kaba man ka sngi, ongki thymmei khubor.(SP News)
