Shillong Nohprah 12: Ki dkhot jong ka Khasi Student Union na Barak Vally na ka jylla Assam, ki la wan sha Shillong ban ia kynduh iaki dkhot jong ka KSU ka jylla Meghalaya ban pan ka jingkyrshan na ki seng bhalang jong kane ka jylla Meghalaya ban pynsngew sha ka jylla Assam ha kaba ia dei bad ka jingdawa ka jong ki.
Ka jingdawa ka jong ki Khasi kiba don ha katei ka jaka ka long ba ki la dep ban ia kynduh ia u myntri rangbah jong ka jylla Assam ban dawa ba ka sorkar Assam ka dei ban shna noh ia ka Barak Valley Khasi-Jaintia Development Council na ka bynta ba kin ioh ia ki kam pynroi naka bynta jong ki.
U vice president ka KSU Barak Valley Circle Comely Gassah u la ong kila dep ban ia kynduhia u myntri rangbah ka jylla Assam bad ia u Lat jong katei ka jylla bad kum juh ia u myntri ba dei peit ia ki rit paid ha ka jylla Assam ban ia kren bad ki ha kaba ia dei bad ka jingeh kaba ki ia kynduh kum ki Khasi-Pnar kiba don ha Cachar, Karimganj bad Hailakandi kaba kim shym hap kano kano ka jingpeit jong ki Atonomous district councils.
Kane ka jingdawa jong ki ka long ba ia mynta kum ki rit paid ha katei ka jylla ki long kiba sah dien ha baroh ki liang bad ki sengew ba da ka jingdon ia ka Council ki lah ban kiew ha kiba bun ki liang ban ia ryngkat lem bad kiwei ki jaid bynriew. Ka jingsah jong ha kitei ki jaka kim dei ban dang shen hynrei ka long naduh ki por kulong kumah.
U president ka BVKJDCDC Sebastian Pakyntein u la ong ba ka jingdon ka jong ki ha katei ka thain ki la ia bun hynrei namar ba ki dang duna ha ka jingmang jingtip ia ki la shu ieh kumto khlem daon ba peit. Wat ka sorkar Assam ruh.
Kumba ka long mynta ia ka jinglong jong ki la buh ha suin namar ba ia ki ym shym la ithuh da ka sorkar Assam la ki dei ki rit paid ne ki ei ha katei ka jylla ki la dawa ba dei ban ithuh ia ki kum ki rit paidbah namar ki dei ki khasi, Pnar, War, Bhoi bad Lyngngam hynrei kane ka jingdawa ka jong ki ka long lehnoh haduh mynta bad ia ki la pyndon kam tang kum ka Vote bank jong ki seng sain pyrthei.
Ban pynneh pynsah ia ka jinglong trai bad iala ka jong ka ktien na ka liang jong ki seng kiba don ha katei ka thain ki la dawa na ka sorkar Assam ba ka dei ban ithuh ia ka jingpule ha ki skul rit ia ka ktien khasi hynrei kumba kalong mynta kim shym la leh ia kaei kaba ki kwah.
Na ka liang jong ka seng KSU Meghalaya ha dien ka jingiakren ki la ai ka jingkular ban ai ka jingkyrshah ia ka jingdawa jong ka KSU Barak Vally la ong u bah Donald Thabah Education Secretary jong ka seng.(SP News)
