Pan jingmut ka State Planning Board na ki VEC & AEC bad C&RD Meghalaya

Shillong, Nohprah 11: Ka jingialang jong ka Working Group-1, Meghalaya State Planning Board kaba la ia kynduh mynta u bnai , ban bishar bniah ia ki Plan, ki rukom pyntrei kam bad ka jingpyndep ia ki jingtrei ki Schemes, jong ka Community & Rural Development ka la long ha kamra Committee Hall-2, Main Secretariat, Shillong hapoh ka jingpyniaid jong u Bah John F Kharshiing Co-Chairman, ha ryngkat ka jingiadonlang ki Co-Chairman, Chairman, jong ka tnad Meghalaya State Planning Board, kynthup ki heh Sorkar jong ka tnad Community & Rural Development (C&RD)

Ha katei ka meeting ki heh Sorkar jong ka tnad C&RD ki la batai bniah bad buh hakmat u Co-Chairman, State Planning Board ia ki scheme bad ki jingtreikam jong ki tnad Directorate Community & Rural Development, Meghalaya State Rural Livelihoods Mission Society(MSRLS), State Rural Employment Society, State Institute for Rural Development(SIRD), Extension Training Center, DRDA, SDPO, ADC, bad ki office jong ki BDO, kynthup ki jingbatai halor ka jingtreikam jong ki scheme NREGS, IAY, NSAP, SRWP, CMSRDF, CRRP, CD Scheme, BRGF, bapher bapher jong ka tnad C&RD.

La pyntip ba ka jingmang tyngka ha ka MGNREGA ka long kumba 300 crore tam ne duna ha u snem 2012-2013, bad la don baroh 4.75 lak ki ba la don ia ki Job Card, katba kiba la shim kam lyngba ka MNREGA ki long kumba 3 Lak tam ne duna haduh u bnai November 2013, kiba la ioh kam lyngba katei ka scheme ha u snem 2013-2014, bad ki don baroh kumba 6094 tylli ki Village Employment Council(VEC), bad kumba 1812 tylli ki Area Employment Council (AEC), hapoh ka jylla Meghalaya.

Haba  phai pat sha ki jingeh kiba ka tnad C&RD ka shem, la pynshai ki heh Sorkar ba kawei na ki jingeh ka long ba kim ioh ia ki officer kiba neh slem ha kitei ki kam kiba ia dei bad ka roi ka par, namar ki long kiba la wan na ki tnad bapher bapher. Ki la pynpaw ba ka la donkam kyrkieh ia ka tnad C&RD ban ioh ia la ka jong ka ‘cadre’ (ki officer kiba kyrpang kiban trei bad shongthait tang ha katei ka tnad Community & Rural Development).

Ka jingbymbiang ki surok synkieng ka ktah ia ka jingtrei kam jong ka tnad. Ka jingduna ka pule puthi ha ki katto katne ki Shnong. Ka jingduna ha ka liang ka roi ka par ha ki Shnong, ka jingeh namar ki don ki jingbym iadei ki kyndon Sorkar India bad ki rukom im jong ki paidbah riewlum, ka jing eh namar ka jingbym don ki bank ha man ki Shnong, ka jing bymdon ka AIN kaban ithuh ia ki bor synshar Shnong, bad ka jingtlot ki VEC bad ki AEC ban long kiba la khreh ha kaba iadei bad ka Plan, ka jingpyntreikam ia ki scheme, bad ha kaban bishar bniah ia ki rukom treikam jong ki scheme bapher bapher kynthup ia ka scheme hapoh ka MNREGA.  La pynpaw ruh ba ka jingmang kaba tang 4% na ka bynta ki kam ‘Administration’ ka la long kaba duna sha ba palat.

Ha ka jingiakren kaba la neh jan lai kynta, la pynpaw ba ki kam kiba hakhmat ki long kumno ban pynkhat thymmai halor ka jingbuh ia ki officer ha ki block ki ba long kiba la shu shim kylliang na kiwei ki tnad. Kaba ar ka long ba la don kam ban wanrah ia ka AIN bad ki RULE ban ithuh ia ki bor Shnong da ka Sorkar Jylla lane lyngba ki Autonomous District Council, ban don ka rukom pyniaid scheme kiba shai hapoh ki Shnong khamtam ha kaba iadei bad ka rukom thied mar jong ki VEC bad ki AEC ha kaba iadei bad ki jingtrei, bad ka jingdonkam ban pynjanai ia ki rukom pynaid ia ki VEC bad AEC, da kaba pynlong ia ki program hikai (training) man ka por na ka bynta ki nongkitkam VEC ha ki Shnong.

Ha kane ka jingiakynduh la mih ka jingkylli halor ka jingbym siew kano kano ka bai lut sngi ia ki nongkitkam Shnong lane ki nongkitkam VEC bad AEC. Ka la mih ka jingia syllok ba la donkam ia ka Sorkar Jylla ban pyrkhat sani bha halor kane ka phang ban pynlut kumba 15 lane 20 crore ha ka ban ai kabai leit bai wan jong ki VEC lane ki AE+C kum shibynta ban ioh ia ka jingpyniaid kaba bniah ia ka jingpynlut kaba jan 450 crore shi snem.  Ki heh Sorkar ki la mynjur ba ka por bad ka kam ka dawa ban siew ia katei ka bai lut sngi jong ki nongkitkam VEC bad AEC, bad ki la mynjur ban phah ia ka kaiphod sha ka Cabinet jong ka Sorkar Jylla Meghalaya.

Na ka liang u Co-Chairman, Meghalaya State Planning Board,  Working Group -3, ha ka sien kaba nyngkong la pynbna bad ai jingmut bad kyntu ia ki Chairman, Secretary, Treasurer, Village Employment Council (VEC) bad Area Employment Council(AEC) ban phah lada don kino kino ia ki jingai jingmut kumno ban pynjanai bad nang kyntiew ia ki rukom treikam jong ki scheme C&RD, da ka jingthoh lyngba ki BDO jong ki lane ban phah beit sha u Bah John F Kharshiing, Co-Chairman, (mobile 9436102663 – office-9856022735), ha ne shwa ban kut u bnai February 2014, kum shibynta ban iarap ia ka State Planning Board ban ioh ai ban pynkhreh ia ka report kaba biang sha ka Sorkar Jylla Meghalaya, la rai ruh ban lum ia ka jingialang jong ki Chairman, ki Secretary, ki Treasurer, VEC bad AEC ha ki katto katne tylli ki Block bad ki District jong ka jylla Meghalaya kum shibynta ban ia kynduh bad sngap markhmat na ki ia ki jingaijingmut bad ki jingeh kiba ki shem ha kaba iadei bad ki scheme Sorkar Jylla bad Sorkar India.

Namar ba bun ki jingpan jingshai na ka liang ki Chairman, Co-Chairman, bad Dy Chairman, la rai ban bteng biang ka jingiakynduh bad ki heh officer jong ka tnad Community & Rural Development kum shibynta  ban bishar bniah ia ki jingtreikam jong ki scheme bapher bapher jong ka tnad  Community & Rural Development bad ki Chairman, Dy Chairman, jong ka Meghalaya State Planning Board ha u bnai January 2014.

Ia ka Meghalaya State Planning Board,  Working Group -3 la lum bad pyniaid da u Bah John F Kharshiing, Co-Chairman, MSPB, ha ka jingiadon lang jong u Shri. Adolf Hitler R Marak, Bah John F Kharshiing, Shri. Fersen Ch Momin, Shri. Francis PR Sangma, ki ba long Co-Chairman, Shri. Grithalson Arengh, Dr Manash Das Gupta, i Dr(Kong) Eureka Lyngdoh, kiba long Deputy Chairman,  bad u Shri. KN Kumar, IAS, Principal Secretary, C&RD, Shri. Akash Deep, IAS, Director, C&RD, Smt. I. Ona R Sangma, Joint Secretary, C&RD, Shri. JE Massar, Dy Director C&RD, Shri. BS Rumnong, Dy Director, SIRD, K Warbah, IT Manager, SRES, bad ki officer jong ka State Planning Board. (SP News)