Jowai, Nohprah 09: Ka Jaintia Indigenous Medicine Association hapoh ka jingialam jong u president ka seng u Dr C.H. Pakyntein kala dawa iaka jingithuh iaka rukom ai dawai kynbat Pnar naka Jaintia Hills Autonomous District Council. Haka jingkren jong u haka jingyni nam (Exhibition) iaka rukom ai dawa kynbat Khasi Pnar (Local Health Tradition (LHT) bad ia ki kynja dawai kynbat (Medicinal Plants) haka 6 bad 7 jong u December 2013 ha Jowai, ula bynñiaw ruh iaka jingbym don jingiarap iaki nongai dawai kynbat Khasi Pnar laka long naka liang ka sorkar ne ka council. Haka jingkren jong u u Dr Pakyntein ula pynpaw ruh iaka jingsngewsih iaka jingnangduh jait jong ki phlang ki kynbad naka daw jong ka jingpynjot iaki khlaw ki btab. Ym duna iaka 50 naka shispah ki kynja jingthung kiba long dawai kila duh jait naka daw ka jingpynjot dusmon jong ngi ia ki khlaw ki btab ong u Dr Pakyntein.
U President jong ka JIMA uba la pynkup kyrdan Doctor daka Martin Luther Christian University (MLCU) ula ong shuh shuh ba naka liang ka seng kala don ka jingpyrshang ban iatreilang bad ki samla pule haka lain Pharmacognosy kiba don mynta napdeng jong ki; kiba wad bniah (research) iaki kynja jingthung kiba ngi pyndonkam ban shna dawai. Kane ka seng ki nongai dawai tynrai kaba don palat 40 ngut ki dkhot kala rai ruh ban trei shitom ban nangpynbha bad pynroi iaka rukom ai dawai Pnar.
Ia kane u Dr Pakyntein ula kren haka jingialang ban plie iaka jingpyninam bad ka jingaidawai kynbad Khasi Pnar kaba la pynlong daka Meghalaya Awareness Society for Communication (MASCOM) ha ryngkat ka jingkyrshan jong ka Office u Deputy Commissioner, West Jaintia Hills District, Meghalaya.
Ia kane ka jingpyninam iaki dawai dashin bad ki rukom ai dawai kynbat Khasi Pnar la plie pyndon burom da u ma MB Rymbai uba long u Chief Executive Member jong ka Jaintia Hills Autonomous District Council, Jowai. U ma Rymbai ula kular ban shimkhia ia ki jingeh jong ki nongai dawai Pnar lada u wan biang haka bor hadien jong ka ilekshon MDC kaban sa wan.
Nalor ki nongai dawai Khasi Pnar; ka Social Forestry jong ka Forest Department West Jaintia Hills District ruh kala wan ban iashim bynta ha kane ka jingpyni nam.(SP News)
