Shillong, Naiwieng 26: ka sorkar Meghalaya mynta ka sngi ka la ai da ka jingthoh sha ka 14th Finance Commission jong ka sorkar pdeng bad ha kane ka jingthoh ka la pan haduh T.50,000 klur tyngka na ka bynta ki kam pynroi ha ka jylla ha ki san snem kiba sa wan.
Ha dien ka jingiakren bad ki dkhot jong ka Commission kaba la lam khmat da u Chairman u Y V Reddy, katba na ka sorkar la kam khmat da u myntri rangbah ka jylla u Dr Mukul Sangma, u myntri rangbah u la ong ba katei ka T. 50,000 klur ka dei na ka bynta ka Non Plan kaba la kot sha ka T.35,000 klur bad kaba tam ka long ban pynbdap ia kaei kaba ka sorkar ka duna.
Ha dien katei ka jingiakynduh bad ki dkhot ka Commission na ka liang jong u myntri rangbah u la iathuh ha ki nongtho khubor ba kane ka jingiakren ka long ban tip ia ka jingdon kam pisa ka jylla . La ong ba ka jingdon kam pisa T.1,986 klur ka long ban pyndon kam na ka bynta ban thung kam ha ki 11,000 tylli ki kam kiba lait.
U myntri rangbah u la ong ba ka jylla Meghalaya ka dei ka jylla kaba dang hap ha kata ka kyrdan kum ka jylla kaba kyrpang, kane ka jingpan ia kane ka pisa ka long ban pyndon kam ha ki kam pynroi ha kiba bun ki liang kaba ka sorkar ka dang don kam shibun ban leh u la ong.(SP News)
