Shillong, Jymmang 22: U myntri ba dei peit ia ka tnad ka koit ka khiah jong ka sorkar Meghalaya u Bah A L Hek u la ong ba ka sorkar kam pat shimia ka rai ha kaba ia dei bad ka jingleit pule jong ki samla na ka bynta ka MBBS. Namar kum ba ka long mynta kim pat sngewthuh shai ia ka rai jong ka Supreme court.
Haba kren ha u SP News Agency lyngba ka phone na Guwahati, u myntri u la ong ba ki samla kiba kwah ban leit pule doctor ki hap ban pass ia ka examin kaba la tip kum ka NEET kaba la dep ban long ha ka 5 tarik mynta u bnai. Kaei kaba ki sngewthuh ka long tang kito kiba pass ia ka tei ka Examin kin sa jied ban pule doctor.
Haba jubab ia ki jingkylli ha kaba ia dei bad ka policy bha kam kaba ka sorkar ka juh but baroh shi katta 40% ia ki khasi-Pnar bad 40% ia ki Garo , 5% ia ki OBC bad 15% ia ki general. U myntri u la ong ba kin sa peit ynda ki la ioh ia ka rai jong ka iing bishar ba don burom.
Kumba ka paw mynta ban ong ba ynleit leit pule doctor tang namar ba ki ioh ki mark kiba heh ha ka exam ka don ka jingar tatin. Kumba ka long ka dang sah ha ka umdum. Ia ka Exam NEET ha kane ka jylla ruh la dep ban pynlong ha ka 5 tarik mynta u bnai.Ki Seat kiba la mang da ka sorkar pdeng ia ka jylla Meghalaya ki dang neh hi 57 tylli ha ki jaka pule doctor ha ka ri baroh kawei.(SP News)
