Shillong, Nailar 04: Ka tand khlaw jong ka sorkar Meghalaya ka la pdam noh ia ka jingthmu ban buh ia ka “elephant reserved” ha West Khasi Hills District ha dien ka jingpyrshah jong ki trai khyndew.
Katkum ka jingthmu jong ka sorkar ban pynkylla iaki bynta jong ka West Khasi Hill ban long ki jaka shnong jong ki hati ka long na khappud bad ka South Garo Hills bad ka East Garo Hills, nangta kan wan sha duh Nonghyllam, ka Warsan Lyngdoh bad na Nirang sha Mawiet.
Hynrei ki trai khyndew khamtam eh na ki briew jong ka thain Warsan Lyngdoh ki la leit ban ai da ka jingthoh sha ka sorkar jylla ban pyrshah ia katei ka jingthmu jong ka sorkar bad bud sha ki trai khyndew kiba dei ki kur na ka thain Lyngngam.
Ka jingthmu jong ka sorkar ka long tang ban ithuh ia katei ka jaka kum ka jaka shong jong ki hati bad haba ka don kano kano ka jingpynjot da ki hati ia ka rep ka riang ne ki iing ki sam ka sorkar ka lah ba ai ka jingiarap ia ki briew ha ka rukom kaba khang biang.
Na ka liang jong ka sorkar mynta ka la pdam noh ia katei ka jngthmu na ka daw ba ki paidbah katei ka thain ki la pyrshah, namar ka don ka jingsngewthuh bakla ba ka sorkar kan shim ia ki jaka, hynrei na ka liang jong ka sorkar kan nym shim ia ki jaka hynrei kan shu ithuh ia katei ka jaka kum ka jaka ba don ki hati.(SP News)
