Shillong, K’lyngkot 02 :Ha kaba iadei bad ka jingphiah constituency thymmai jong ka Khasi Hills Autonomous District Council (KHADC) da ka jingthmu ban pynduh noh ia ka Laitkroh Constituency,
Ka Kynhun ki nongialam jong ki Shnong bapher bapher kiba hap hapoh ka Laitkroh Constituency hapoh ka jingialam jong u Samla Egenstar Kurkalang President Seng Samla Shnong Laitkyrhong Pyllun kila phah da ka dorkhas sha u Lat ka jylla ban pynpaw pyrshah jur ia kane ka jingthmu.
Ka jingpyrshah ka long halor ka nongrim ba ka District Council kala shu leh donbor bad leh khlem nongrim ban pynduh ia ka Laitkroh constituency kaba la don lypa.Hadien ba u Lat ula kyntait arsien ia ka Bill phiah constituency jong ka KHADC (Constitution of District Council (Amendmend) Rules 2013, bad ula ai jingmut ban shna da ka Delimitation Committee ban bishar bniah halor kane.
Hynrei, watla ka KHADC kala pdiang ia ka jingai jingmut jong u Lat bad kala shna ia ka Delimitation Committee 2013, pynban na ka liang ki nongialam shnong kila shem ba ia kane ka Committee la shu shna tang dep rukom (formality) tang ban pynlong ia ki jingpynsngew paidbah ne public hearing khlem da don ia kino kino ki kyndon ne ki mat treikam kiba shai ba kum ka Delimitation Committee kadei ban don ia ka bor ba laitluid bad kyrpang ban bishar bniah nadong shadong ban pynkhreh thymmai ha kano ka rukom yn leh bad kumno ban pynbiang lane iahap bad kadei ban da iaid kylleng ki shnong ki thaw bad kylleng ki jaka jong baroh 29 tylli ki constituency.
Ki nongialam shnong kiba hap hapoh ka Laitkroh constituency kila pynpaw ruh ba ia ka Public Hearing ruh la shu leh tang dep rukom tang ha ki jaka kiba dei ki District head quarter, kata tang ha Nongpoh, Nongstoin, Mawkyrwat bad Shillong na ka bynta baroh 29 tylli ki constituency ka bym lah ban pdiang bad kaba khlem don nongrim.
La ong ruh ba wat ia ka jingpyntip ban pynlong ia ka public hearing ruh kam long katkum ka rukom, namar khlem kano kano ka jingpyntip ba kyrpang (official notification) sha ki Khlieh Nongsynshar, ki Rangbah Shnong, ki nongialam jong ki kynhun bapher bapher na ka bynta ban wan iashim bynta, hynrei la phah jingtip tang lyngba ki lad pathai khubor.Kumjuh ruh ia ka Draft Bill ki khlem phah copy ne ai copy khnang ban ioh ban bishar bniah bad ban ioh ia ai jingmut lang.
Nalor kata ka Delimitation Committee ka khlem pynkhreh ne pynkylla ei ei ruh ia ka Draft Bill, hynrei kadei ka juh hi kaba la pass da ka KHADC bad kaba la shah kyntait arsien ha u Lat ka jylla. Kumta mynta ka kynti ruh ki phah da ka juh hi bad kane ka jingleh ka pynpaw bieit ia ka District Council bad ia ka Delimitation Committee namar kila shu leh khlem nongrim bad ka bym ioh ia ka jingshaniah bad ban ngeit ba ka Delimitation Committee kaba don tang 5 ngut ki dkhot tang ha i por iba lyngkot hapoh shi bnai kaba la buh ha ka 10 tarik Naiwieng 2013 ka lah ban trei pyndep ia ka jingphiah ia ki 29 tylli ki constituency bad ia ka report kila phah sha ka EC ha ka 12 tarik Nohprah 2013 kaba ym lah ban mutdur ha kano ka rukom ki treikam.
Kumta kane ka paw shai kdar ba ka District Council kam kwah ban leh janai, ka kwah ban shu leh donbor bad iuh roit ia ka hok ki nongsynshar paidbah kaba long pyrshah ruh ia ka hok longbriew manbriew ha ka jingsynshar paidbah bad ruh ka pynsniewdur ia ka sap nongialam bad ia ka riti synshar. Kane ka long katkum ka kyrwoh lyngba u Samla Egenstar Kurkalang.(SP News)
