Shillong K’Lyngkot 14: Ka ophis u Returning Ophisar ka East Khasi hills distrik mynta ka sngi ka la phah da ka show cause notice sha u MLA ka Laban Bah Sanbor Shullai jalor ka jingpynkheiñ jong u ia ki jingmana (model code of conduct) ba la pynbna bad pyntreikam da ka Election Commission jong ka Ri India hadien ba la pynbna ia ka tarik thep vote kata ha ka 23 tarik u Rymphang 2013 ha Meghalaya..
Na ka liang u u Returning ophisar ka distrik uba dei ruh u Deputy Commssioner Sanjay Goyal u la ong, “ngi dang dep ban phah ia ka show cause notice hynne ka sngi sha utei u MLA ka Laban ha kaba ngi la ai por ia u haduh 17 tarik une u bnai ba un phah ia ka jubab bad ka shong ha ka jubab jong u bad ka Election Election hadien ba ka la bishar bniah kan sa shim ia ka rai”.
Shuh shuh u Goyal u la ong, haba iadei bad ka jingpynkheiñ jong u MLA ka Laban ia ka jingmana (odel code of conduct) ba la pynbna da ka Election Commission ia mynta ym pat lah ban ong eiei katba ym pat ioh ia ka jubab utei u MLA.
U Goyal u la ong ruh, ban pynshitom ia ka jingleh bym suidniew jong u Bah Sanbor yn sa bishar hi da ka Election Commission hadien ba u Chief Electoral Ophisar un aiti ia ki kaiphod ba la dep pynkhreh hadien ba la ioh ia ka jubab na utei u MLA.
Lah ban shu pynkynmaw ha ka sngi Saitjain ba ladep tang shi sngi hadien ba ka Election Commission ka Ri India ka ladep ban pynbna ia ka tarik ilekshon, u Bah Sanbor Shullai ha ryngkat ki nongbud jong u ki la sam ia ki tiar na ka skhim MLA ha Raid Laban College.
U Bah Sanbor uba dang shu shimti kum u President ba thymmai ka NCP ulong ruh u kyrtong jong kane ka seng na Shillong South ha ka elekshon ban sa long shen ha ka 23 tarik u Rymphang mynta ka snem.
Na ka liang u Chief Electoral Ophisar ka Jylla P. Naik u la ong ba na ka liang jong u ia mynta um pat lah ban ong eiei namar un dang hap ban ap ia ka kaiphod na u Returning Ophisar bad ka jingpynshitom kan long katkum ka kaiphod lyngba u Returning Officer.
