Shillong, Rymphang 10: Ka jylla Meghalaya mynta ka don hapdeng ka jingkyrduh bor ding kaba jur bha bad kane kala ktah ia ki samla pule kiba don mynta hapdeng ka examin.
Ki jaka pynmih bor ding ha kane ka jylla ruh kim shym la lah ban trei kam kumba la thmu. Halor kane u myntri ka tnad pynmih bor ding u Clement R Marak mynta ka sngi u la khot ia ka jingialang ba kyrpang ban ia kren ia kane ka kam.
Haba kren ha ki nongthoh khubor mynta ka sngi u myntri u la ong ba ha ka por ba duna um ka Leshka ka pynmih bor ding tang kumba 6 haduh 7 MW, wat la ka bor jong ka ka dei ban pynmih haduh 126 MW.
Kumba ka long mynta ka jingdon kam ia ka bor ding ha ka jylla ka long haduh 214 MW katba ka jingpynmih ka long tang 171 MW bad ka jingduna ka long haduh 43 lane 44 MW. Dei na kane ka daw ba hap ban pynlip ia ka bor ding eletrik ha ka por miet.
Kane ka jingeh ka mih ka dei na ka daw ba ka sorkar Meghalaya kam pat lah ban siew ia ka bai light kaba dei jong ka NEEPCO bad katei ka company jong ka sorkar pdeng kala sangeh ka jingai bor ding sha kane ka jylla la kubur u myntri.
Kumba ka long mynta ka jylla Meghalaya ka la pynsah bai light sha ka NEEPCO ka long haduh T.385.89 klur bad sha kiwei baroh ka long 449.93 klur. Na ka liang jong ka sorkar jylla ka la thoh sha ka sorkar pdeng ba kan iarap lem ban siew ia kane ka bai light kaba sah na ka liang jong ka sorkar pdeng ka la bthah ia ka sorkar jylla ba kan shim ram na ka SBI.
Na ka liang jong ka sorkar mynta ka dang peit ha kano ka por ban pynlip light khnang ba kan nym ktah ia ka jingpule jong ki samla pule ha kane ka por examin, la ong u myntri.(SP News)
