Jowai, Jymmang 09: Uwei naki jingthew uba ngi lah ban pyndonkam ban thew iaka jingduk tasam jong ki briew ka long la ki lah bor ne em ban kynshew pisa. Ki briew kiba dang lahbor ban kynshew pisa lehse kim da dei eh kiba duk haba ianujor bad kito ki bym don ka jinglah wat tang ban kynshew pisa. Ka Phlonginkhaw kaba don tang hapoh 20 KM na Jowai bad kaba dei ka shnong kaba hap hapoh ka Jowai konstitwensi ka dei ka shnong kaba ki nongshongshnong kim kot bor wat tang ba kynshew pisa.
Ia kane ka jingshisha la lap haka jingai jinghikai ban pynshai ha kaba ia dei bad ka pisa pilain (Financial Literacy Campaign) kaba la pynlong daka Society for Urban and Rural Empowerment (SURE) ha ryngkat ka jingkyrshan jong ka National Bank for Agriculture and Rural Development (NABARD) ka sorkar India. Ka jingjurib (survey) kaba la pynlong la lap ba naki 130 tylli ki longing tang 13 naka shispah kiba don account haki bank. U Tarly Mukhim uba long u Rangbah Shnonng ula ong ba kiba bun na kine ruh ki dei kiba plie account naka bynta ban ioh bainong shispah sngi namar baka MNREGS mynta ka phah beit iaka bainong shaka account jong ki nongtrei.
Kane ka shnong kaba rit ka don harud jong ka wah Umngot ba ki nongshongshnong ki im da kaba rep bad naki iing ki sem bad ka jinglong jong ki ruh la ithuh iaka jingduk jong ka shnong la ong u Teidor Thangkhiew District Development manager ka NABARD, Jowai. Haka kynta ia kylli jingkylli kaba la long hadien jong ka jingai jinghikai, baroh ki kynthei kiba kren ki ong ba namar ka jingduk kim yn ym lah satia ban kynshew pisa. Ka Blian Mukhim ka ong ba ngi shu dap tang ban bam man ka sngi, kumo phi khmih lynti ia ngi ban ngi kynshew pisa? Ka Dri Suting kawei pat ka longkmie kala ong ba kat kaba ngi iohei na ka rep ka riang; ngi lut haba bam, thied iaki jingdonkam bad ban phah skul khun katba ngi lah synei. Ka Priana Mukhim ka ong ba namar ba ngi shu dap tang ban bam naka rep, ngi la pyrshang ruh ban ri sniang hynrei sniewbok kiba bun ki iap noh.
U T. Thangkhiew ula pynshai iaki nongshongshnong shaphang ka Kisan Credit Card ne ka ram iaki nongrep kaba ki lah ban ioh haduh shilak tyngka, u kyntu iaki ba kin pyndonkam hok ia kane ka ram khnang ban kyntiew iaka ioh ka kot jong ki. Ka kong K. Kharmalki ka branch manager jong ka Meghalaya Rural Bank, Wahiajer ka kyntu iaki paidbah ba ki pyrshang ban kynshew katba lah synei bad ban pynmyllien ban kynshew pisa khnang ban suk ka lawei. Ka iathuh ruh ba mynta ki briew ki lah ban plie account khlem pisa ruh. U H.H.Mohrmen u president ka society ula pynkynmaw ban husiar naki kompani thok kiba shu pynbeit iaki paidbah ban ai ka sut kaba heh bad jah pat hadien bala ioh pisa. Ula pynkynmaw ruh ba ym dei ban ngeit beij iaki SMS bad email thok kiba pynbeij iaki paidbah. (SP News)
