La
Shillong, Kyllalyngkot 06: Hadien ka jingangnud kaba la slem bha da ki paidbah nongshong shnong ban ioh ia ka Hall na ka bynta ban pynlong ia ki jingialang shnong bad kiwei kiwei ki jait ai jinghikai ha kaba iadei bad ki skhim sorkar, hynne ka sngi, ka shnong Mawtawar ka la dap da ka jingkmen kaba khraw haba u Bah P.T Passah, Block Development Officer (BDO) ka Mylliem C& RD Block ha ryngkat ka jingiadonlang u Bah Embhahlang B. Syiemlieh, MLA/MDC ka Mawlai Constituency ki la plie paidbah ia ka Hall ba la shna na ka skhim Bharat Nirman Rajiv Gandhi Seva Kendra (BNRGSK) ha ka shnong Mawlai Mawtawar, Shillong.
Na ka liang u BDO haba kren sha kane ka sngi kum u Kongsan u la ong, katkum ki kyndon ba la pruiddak ha kaba iadei bad kane ka skhim ba la bhah na ka sorkar pdeng, ka jingpyn donkam ia kane ka Hall kan long beit thik na ka bynta ki jingai jinghikai ia ki prokram jong ka sorkar bad kiwei kiwei pat ki jingdonkam jong ka shnong. “Katkum ki kyndon treikam kane ka skhim BNRGSK, ia kane ka Hall ym shah satia ban pynkylla sha ki rynsan ialap elekshon ne kino kino ki kam sainpyrthei,” bynrap une u Ophisar ka Mylliem C& RD Block.
Na ka liang u Bah Embhahlang, MLA ka thain u la ong ka jingioh ia kane ka hall kan long ka jingkyrkhu ia ka shnong ka thaw bad pynpaw ruh ba kum u Nongmihkhmat u ban sa shongthait noh na ka jinglong Nongmihkhmat sha ka Khasi Hills Autonomous District Council (KHADC) u la pynkhreh lypa ia ki skhim na ka bynta kiwei kiwei pat ki kyntoit kiba don hapoh ka shnong Mawlai Mawtawar ba kin ioh ia ki Community Hall bad kiwei kiwei ki skhim MDC.
“Nga kwah ban theh lut sha ki paidbah khlem da pyndonkam bakla wat tang shi tyngka ha kaba iadei bad ka bhah (Scheme) kaba u paidbah u dei ban ioh sha ki shnong bad ki kyntoit bapher bapher na ka MDC Scheme shwa ba ka samoi treikam kan kut noh ha u bnai Rymphang,” la ong u Bah Embhalang B. Syiemlieh.
U Bah I.R Kharsyndon, Rangbah Shnong ka Mawlai Mawtawar u la pynpaw ia ka jingsngewnguh ia u BDO uba la lah ban trei shitom bad kumjuh ia u Chairman ka VEC Lummawsing, AEC Mawtawar, Bah B. Lyngdoh, JE Mylliem Block bad kiwei kiwei kiba la donkti ban pynieng ia kane ka Hall na ka bynta ka jingdonkam jong ka shnong baroh kawei. “To ngin sumar bad lehkhuid ia ka, wat biah, wat tah shun bad wat pynjaboh ia ka namarba ka dei ka nongkynti jong ngi,” u la kyntu ia ki paidbah nongshong shnong.
Ha kane ka sngi la sakhi lang ruh ki dkhot ka Executive Committee jong ka Shnong, ki dkhot ka Seng Kynthei bad Seng Samla bad ki paidbah ka shnong Mawtawar.
Hadien kane, u MLA u la iakynduh kyrpang ia ki Nongialam ka shnong ha kawei pat ka jingialang ban aiti ia ka work order na ka MDC Scheme kaba u la mang sha ka Shnong Mawlai Mawtawar kaba T.1.50 lak.(SP News)
