Jowai, Nailur 18: U Myntri ka tnt Forest & Environment etc ka sorkar jylla, u Bah P. Tyngsong ha ka 17 tarik u Nailur u la plie ia ka Khnap Thangbru (ka jaka thangbriew) ha ka shnong Khliehrangnah Shangpung. Kane ka jaka thangbriew ka dei kaba 12 hapoh ka Jaintia Hills bad ka jinglut jingsep ha kaba shan bad tei ia ka ka la kor kumba T.15,20,000.
Ha kane ka ngi plie ia katei ka Khnap Thangbru, la pynlang ia ka jingialang ba la pyniaid da u Parliamentary Secretary ka sorkar jylla u ma C. Ymbon uba long u MLA ka thain. Ha kane ka jingialang la pyndep ia ka jinglehniam ka nguh ka dem u samla Marlan Sungoh bad la ioh ruh ka jingkren na kiwei pat ki riew rangbah ba kynthup ia u ma Wanbok Sutnga (General Secretary Dorbar Shnong Khliehrangnah), u Wh. Mihnyngkong Sutnga Secretary ka Working Committee Khnap Thangbru Khliehrangnah. Ha kane ka sngi la aiti ruh ia ka memorandum da ka Kong Vitness Langbang kaba long ka Headmistress jong ka Sein Raij U.P School Khliehrangnah kaba kdew shaphang ka jinglut jingsep ha kaba shna bad tei ia katei ka Khnap Thangbru kaba la kot T.15,20,000.
U Bah Tynsong kum u kongsan ha ka jingkren jong u, u la iatoh shi kat dei eh ia ka Dorbar Shnong Khliehrangnah kab ala iarap bad noh synniang lem ha ka liang ka jinglut jingsep kaba la kot haduh 10,49,000/-. U la ong, kane ka jingnoh synniang ha kaba shna bad tei ia kaneka Khnap Thangbru ka long shisha jingiatreilang kaba khraw bad ka long ka nuksa ia kiwei pat ki shnong ban ia snohktilang ha kano kano ka kam kaba iadei bad ka bha ka miat bad jingmyntoi ki paidbah ka shong bad ka than hi baroh kawei.
Ha kaba iadei bad ka Memorandum kaba kdew ia ka jinglut jingsep, u Bah Tynsong u la ong, ba un sa kren hapoh ka Dorbar thaw aiñ ban pynioh ia ki skhim jingiarap ha kaba tei bad shna ia kum kine ki jingjingtei bakongsantam ha ka jinglehniam ba khatduh ia kiba ieit ba thoid kiba la khlad noh na kane ka pyrthei.
U Bah Tynsong u la pynapw ka jingiaroh kaba khraw ia u ma Kambell Shullai (bam kwai ha dwar u Blei) uba lap nyngkong eh ia kane ka buit thangbriew kaba tip kum ka Khnap (Thangbru).
Shuh shuh u bah Tynsong ula ong ruh ba yn sa pynphriang ia kane ka khubor sha ka thaiñ jong u, khnang ba ki briew kiba dang pyndonkam da kaba thang ia ka met iap, kin shna noh da kane ka khnap Thangbru kaba ai myntoi shibun bha.
Kiwei pat kiba la ia donlang ha katei ka jingialang plie Khnap Thangbru ki kynthup ia u Bah Oriwel Shullai, Dr. S.S Manar, Bah Nidalam Sungoh, J.K Passah, W.Dhar, Doloi ka Shangpung Elaka u bah K.C Rymbai Doloi Jowai Elaka, u ma D. Challam Divisional Officer, Soil & water Conservation, Jaintia Hills District, ma K.M Lytan MDC kane ka thaiñ uba long ruh u EM,JHADC bad kiwei kiwei ki riew rangbah bad longkmie.(SP News)
