Shillong, Nailur 05: U Bah AL Hek myntri ba dei peit ia ka tnad Information Technology u la plie ia ka jaka ai jinghikai computer ha Nongmensong Presbyterian L.P. bad U.P. School, Shillong ha kaba u MDC jong kane ka jaka u Bah AN War u la ia don lang.
Ha ka jingkren jong u Bah Hek kum u kongsan ha kane ka sngi u la ong ba ka sorkar ka kwah eh ban kyntiew ia ka pule puthi ha kane ka jylla khamtam eh ha kaba ia dei bad ka jinghikai ia ki computer. U la kyntu ia ki khynnah skul ba kin shim khia ha kaba ia dei bad ka jingpule ia kane ka bynta namar ka long kaba don kam.
Ha kane ka skul ki don 7 tylli ki computer bad ia kine ki computer la pynioh ia kane ka ksul lyngba ka skhim jong ka North Eastern Council na ka skhim kaba la tip kum ka “IT Education Programme in Meghalaya” na ka bynta jong u snem 2011-12.(SP News)
