Shillong Nohprah 21: Hadien ka jingslem ban plie naduh u snem 2010 ia ka Mawlai Umjaiur Mawthohlew Water Supply Scheme kaban pynbiang ia ka umbam umdih ki paidbah kane ka thain, ha ka sngi thohdieng la plie paidbah ia kane ka jaka sam um ha ka jingialang kaba la long ha Mawlai Umjaiur. Hynrei na ka liang ki nongshong shnong ryngkat bad ki nongialam ka KSU Mawlai Umjaiur kila pynpaw ba kane ka jingplie ka long tang ban pynbiej ia u paidbah ba la jan ka por elekshon namar ba kim pat ioh um satia.
La mang 66,71,200 tyngka ban pyntreikam ia kane ka project ha u snem 2007 ha kaba yn pynbiang um kumba 1470 ngut ki paidbah kane ka thain bad la buh por ban pyndep ha u snem 2010 hynrei la plie pat ia kane hynne ka sngi da u Myntri ka sorkar jylla uba khmih ia ka tnad Water Resources u bah AL Hek kum u kongsan ryngkat ka jingia donlang u MLA ka Mawlai u bah FS Cajee, ki nongkitkam shnong kane ka thain bad kiwei kiwei.
U Bah Hek haba kren ha ka jingialang ula ong ba ki paidbah kane ka thian ki long kiba donbok shibun namar ba ki ioh da ka um kaba mih na ki umpohliew ym ka um kaba hap ban shu drill bad ula ong ruh ba kane ka um ka long kaba bha ban dih bad pyndonkam ha kaba ym donkam shuh ruh ban shet. U bah Hek ula kyntu ruh ia ki paidbah ba kidei ban ialeh ban pynneh pynsah ia ki tyllong um da kaba thung ia ki dien ki siej.
Hadien bala wai kane ka jingialang ban plie ia kane ka Water Supply Scheme, na ka liang ki nongshong shnong ryngkatbad ki nongialam ka KSU Mawlai Umjaiur kila pynpaw ba kane ka jingplie ka long tang ban pynbiej ia u paidbah ba la jan ka por elekshon namar ba kane ka jaka pynbiang um kam pat biang nadong shadong bad wat ban sam ia ka um ruh la shu pyndonkam da u Generator bad ym pat ioh ia ka connection jong ka bording haduh mynta bad ki paidbah kim pat ioh satia ia kata ka um na kane ka WSS.
U President ka KSU Mawlai Umjaiur u samla Donboklang Kharlyngdoh ula ong ba kane ka jingplie ia kane ka WSS ka dei kaba la shu leh pyndep rukom tang ban pynbiej ia u paidbah bad wat ha kane ka jingialang ha ka jaka ba kin iakren shaphang kane ka jaka sam um pynban ki ialap elekshon ban pynsngewthuh ia u paidbah ban ai jingkyrshan ia kine ki nongmihkhmat ba kin jop don burom biang.
Shuh shuh ula ong ruh ba ka jinglah ban pynsted ia kane ka kam ha kaba iadei bad kane ka jaka sam um kadei lyngba ka jingjurip ka kynhun KSU ha u Risaw 2012 ha kaba kila shem ba kane ka jaka sam um ka dang sah khongreng bad kane ka jinglap ka jongki kala pynkitdit thiah ia u MLA kane ka thain uba la kular ba kane ka jaka sam um kan sdang treikam ha u snem 2010 kaban long kum ka jingai sngewbha krismas ia u paidbah kane ka thain. Nalor kane ula ong ruh ba ka jingslem ban pyndep ia kane ka projek kadei tang namar ka jing bym larkam bad ka jingbym shimkhia u MLA kaba la buh ia u paidbah ha ka jingeh ha kaba ki hap ban shu thied ia ka umbam umdih ban pyndonkam hala ki iing ki sem.(SP News)
