Shillong, Sept 9: U Chief Secretary jong ka jylla u Bah W.M.S.Pariat mynta ka sngi u la plie ia ka shibynta jong ka iing kaba dang shu dep ban shna thymmai jong ka St Anthony’s College ia kaba la ai burom ha u Fr. Joseph Arokiasamy Block, department jong ka tand hikai ia ki kam Ri Dohkha.
Ha ka jingkren jong u Bah Pariat u la ong ba ka Aquaculture Mission jong ka sorkar ka dei kawei na ka shibynta jong ka Integrated Basin Development and Livelihood Programme (IBDLP) kaba la pynmih da ka sorkar jylla dang shen ban long kawei na ki lad ai kam ia ki paidbah.
U ne u heh duh jong ki ophisar ka jylla Meghalaya u la kyntu ia ki samla pule kin shim ha lade ia kane lad ba kan long kawei na ki lad kamai ha kane ka jylla da ka jingdon ki tyllong um bad ki wah ha kane ka jylla. Ka jingpule kaba biang kaba ka jylla ka don kan iarap ia ki samla ba kin lah ban seng ia la ki jong ki kam.
Ha kane ka sngi na ka liang jong u bah Parait u la pynlait paidbah ruh ia ka Video kaba la pynkhreh da ka Meghalaya Basin Development Agency kiwei kiba la kren ha kane ka jingialang ki long u K. N. Kumar, u. R. M. Mishra, Brother Albert L. Dkhar, Fr. D. John Jayakumar bad u Dr. R.N. Bhuyan.(SP News)
