Shillong, Nailur 03: U myntri rangbah ka jylla Meghalaya u Dr Mukul Sangma mynta ka sngi u la plie ia ka E-pay Roll na ka bynta ki nongtrei jong ka sorkar Meghalaya. Kane ka long ban buh jingthoh tiak tiak ia ka rukom sinew ia ka tulop na ka bynta ki nongtrei sorkar.
Haba kren ha kane ka jingplie ia kane ka rukom buh jingkhien ia ka rukom siew tulop ia ki nongtrei sorkar u myntri rangbah u la ong ba ka jingangnud jong ka sorkar ka long ban peit ba ki jingtreikam jong ka sorkar kan long kaba beit ba ryntih khlem da buhrieh na khmat jong ki paidbah. Da ka jingdon ia kane ka thechology kaba thymmai kan iarap ia ka tnad pla pisa jong ka sorkar ban peit ia ka jinglut jingsep ha kaba ia dei bad ka jingsiew ia ka tulop jong ki nongtrei sorkar.
U Bah P.A. Sawian, Joint Secretary, Finance, ha ka jingkren lyngkot ka jong u u la batai ia ka jingtrei kam kane ka Meghalaya Employee Information System (MeghEIS) kadei kaba la shna kyrpang da ka jingiatreilang bad ka NIC na Pule bad na Shillong. Kane kan long na ka bynta ban pyniaid ryntih ia ka jingsiew ia ka tulop jong ki nongtrei sorkar bad ia ka bai bam tynmen.
Kane ka technology kan long ruh kum ka jingbuh ryntih ia ki nongtrei sorkar baroh ia ka jingtip ha kaba ia dei bad ki naduh ka sngi ka por ba ki trei bad ka por ba kin shong thait, ka por ba kin ioh ia ka jingkiew kyrdan ka jong ki lane ka ram kaba ki shim na ka sorkar bad ia ka bank account ka jong ki bad kaei kaba ki nongtrei sorkar ki dei ban ioh.
Ki heh sorkar kiba la ia don lang ha kane ka sngi ki long u Chief Secretary Mr. W.M.S.Pariat, Additional Chief Secretary Finance department, U B. K. Dev Varma, Commissioner bad Secretary Finance department, Smt. R.V. Suchiang, U bah P. A. Sawian, Joint Secretary Finance department, U K. S. Momin, Director Accounts and Treasuries, Mr. T. Dkhar, State Informatics Officer, ka kynhun na Pune bala lam khmat da ka Prathibha Joag ka Dr. Swati Sardesai, Deputy Director Generals jong NIC, Pune.(SP News)
