Shillong, Kyllalyngkot, 23: Kawei ka ing jong i Kong Friday Dkhar iba dei i kurim jong u Bah Bhalang Siangshai na ka shnong Jalyiah, ka la shah bamduh ha ki thylliej ding ba ishyrkhei bha ha ka 22 tarik, mynta u bnai ha ka por 3 baje janmiet.
Ki thylliej ding kiba ieng bha, ki bam shngiam ia ki jingdon jingem jong kane ka ing baroh kawei, kynthup naduh ki tiar ing tiar sem, ki jain ki nep, ki kot ki sla ka Birla Life Insurance Company Ltd, Bajaj Aliance, Land Holding Certifecate, ka Jobcard, Passbook, Fixed Deposit MRB Lad-Rymbai, ar tylli ki Cylinder Gas (LPG) ki Ksiar ka sahti, u locket ksiar bad ka pisa T. 5, 000,00 lak. Ka jinglut haba khein antad baroh ka la kot sha ka T.15 lak.
La iathuh ba ka jingpluh jong kane ka ing ka dei na ka daw ka jingthang mombati ki trai ing ha ka por ba lip bording hynrei ynda la meh ka bording, ki trai ing ki la klet ban pynlip. Donbok ha kane ka jingjia ym shym la don mano mano ruh ba la mynsaw.
Lyngba u kyrwoh ba phah da bah R. Harvis Phawa, Rangbah Shnong ka shnong ka Jalyiah, u ong ba un sa lum ia ka jingialang kaba kyrkieh jong ka Executive Committee ka Shnong ban iapyrkhat na ka bynta u synniang ban noh sha kine ki lanot kiba iakynduh ia kane ka jingjynjar. Ha kajuh ka por ula kyrpad ruh ia ki bor Sorkar ban phah kham kloi ia ki jingiarap sha ki trai ing.(SP news)
