Shillong, Rymphang 25: Ka ophis u District Transport Office (DTO) kaba don ha Lower Lauchmiere, Shillong kala shah bam shngiam ha ka ding ha ka por 1:30 mynstep hynne ka sngi nyngkong, kane ka ding kala bam duh iaki kot ki sla kiba donkam bad iaki pisa kaba don ha kawei na ki kamra ha katei ka ophis (strong room).
Kawei na ki kamra jongka ophis DTO kaba la tip kum ka Strong Room kaba buh iaki kot donkam bad ruh iaka pisa kiba ka iohlum kila ingkhong khait ha ka jingklang ka ding bad ha kaba iadei bad kane, na ka liang ki pulit kim pat lah ban ong eiei hynrei ki dang pynlong ia ka jingtohkit halor akne ka jingjia.
Ka jingklang jong ka ding, ka la pynjulor haduh lai tylli ki kamra jong katei ka ophis, kaba kynthup ruh iaka Strong Room, ha kaba la ju buh ia ki kot donkam bad ka pisa nalor kiwei kiwei pat, la iathuh ka tyllong khubor na ki heh sorkar.
Na ka liang u District Transport Officer, East Khasi Hills, Bah C Lyngdoh u la iathuh, ba u la ioh jingtip halor kane ka jingpluh ding tad haduh ka por 9.30 mynstep ha ka por kaba u la poi sha ka ophis treikam.
Hynrei kaba sngew lyngngoh ka long, ba na ka liang u nongap pahara B Shah um shym la don satia ha katei ka por jong katei ka jingjia, la ong ka khubor ki pulit bad dei tad ha ka por ba na ka liang ki pulit pynlip ding ki la jan dep ha ka ban tem ia ka ding, utei u nongpahara u sa wan poi ha katei ka jaka.
Ngim pat lah ban ong eiei halor kane ka jingpluh ding, la ka lah ban dei ba ka ïng na ka jingthut ka ding ilektrik ne ioh don kiba donkti ha kane ka kam bad kumta ka jingtohkit halor kane ka dang iaid shakhmat,” la ong uwei na ki heh pulit uba la wan ban jurip ia katei ka jaka, haba iakren bad ki nongthoh khubor.
Utei u heh pulit u la iathuh ba da ki hajar ki kot ki sla kiba donkam ki la ingkhong lut, ia kiba la buh ha kitei ki lai tylli ki kamra kiba la shah bam shngiam ha ka ding.
Na ka liang ki pulit, ki la pan jingiarap na ka tnat Forensic ban tohkit bniah halor kane ba kumno ka ding ka ioh ban klang ha katei ka ophis kaba la tei da ka maw, bad kata ruh ha ka por dang step phyrngab jong ka sngi Nyngkong.(SP News)
