Shillong, Jymmang 27: Ka Meghalaya Industrial Development Corporation ka la poi mynta ha u dak saw ha ka jingtrei kam ka jong na ka daw ba ka sorkar jylla ka leh sting palat ka sorkar ha kine ki snem kiba la dep.
Ka MIDC ka dei na ki corporation jong ka sorkar Meghalaya kaba lah ban ieng ha la ki jong kjat ha ki snem kiba la leit noh hynrei mynta kane ka Corporation ka la don hapdeng jong ka jingma na ka daw ba ka sorkar ka la shimsting.
Ka jingduh jong ka MIDC ka long ba ha ka por ba ki lai tylli ki shant trei kam jong ka kum ka Bamboo Chip, The Meghalaya Watches bad Meghalaya Electronic Development Corporation kila khyllem ha ka jingtrei kam ki jong ki, ha kaba kim dong jingmih shuh ka sorkar ka la phah siew ia ka tulop jong ki ha ka MIDC da ka jingong ba ka sorkar kan sa pynphai biang.
Da kaba siew ia ka tulop jong ki nongtrei jong ki tei ki lai tylli ki coporation jong ka sorkar mynta ka MIDC ka la poi ia lade ha ka jingeh wat tang ban siew ia la tulop jong ki nongtrei. Kumba ka long mynta ka dang lah ban siew ia ka tulop jong ki nongtrei hynrei kam lah shuh ban ai ram sha ki briew namar ki nongtrei ki im na ka sut kaba ki ioh na ka jingairam.
La ioh jingtip ba ka MIDC ka la thoh sha ka sorkar ba kan siew noh tang ia ka tulop jong ki lai tylli ki Coporation ba ka la pynisew ha ki snem kiba la dep hynrei kumba ka long mynta ka sorkar kam pat pynphai ia kane ka pisa.
Ban pynim ia ka jingthmu jong ka MIDC kane ka corporation ka don kam ia ka corporation ba ka hap ban wad pisa na ki nongbeipisa kiba na bar jong ka sorkar ban pynim ia ka jingtrei kam jong ka MIDC bad na ka liang jong ka MIDC ka don kam ia ka jingmynjur jong ka sorkar.(SP News)
