Shillong Nailur 21: Ki 10 tylli ki sengbhalang kila iakynduhlang hynne ka sngi bad da kawei ka jingmut kila rai ban pynlong ia ka Pakhang Surok Miet ne ka Night Road Blocade naduh ka 23 tarik haduh ka 27 tarik kaban sdang naduh ka por 8 baje mynmiet haduh 5 baje mynstep katba ha ka 26 bad 27 tarik pat kan donlang ka Pakhang Ophis ne ka Office Picketing.
U Information Secretary ka Federation of Khasi Jaintia and Garo Peoples(FKJGP) u Eldie Lyngdoh ula ong “Ba ka jingkuman ka sorkar haduh mynta bad ka jingsngap mynthi ia ki jingdawa ki jong ngi, ngi ki 10 tylli ki seng, ngi la shim ia ka rai ban bteng biang ia ki jingiakhih ban pynbor ia ka sorkar ban pyntreikam noh ia ka ILP ha ka jylla bad Ngi lah buh ia ka Pakhang surok miet naduh sngi nyngkong haduh ka sngi thohdieng bad ha ka sngi palei bad sngi thohdieng kan donlang ka Pakhang Ophis”.
U Eldie ula ong ruh ba ki sengbhalang ki ai khublei ia baroh ki paidbah kiba la ai jingkyrshan ia kane ka jingiakhih ban dawa ia ka ILP bad ula kyntu ia baroh ki paradoh parasnam ban bteng ia ka jingai jingkyrshan ba radbah ban pynbor ia ka sorkar ban pyntreikam noh ia ka ILP ban khanglad ia ka jingwan rung kyrthep ki Mynder ri bad ki bar jylla.
“Ngi skhem ha ka nongrim ban dawa na ka sorkar ban pyntreikam mardor ia ka ILP bad ngin ym randien watla ka sorkar ka pyntieng kohtympan da ki ain ekjakor (Draconian Laws)” la pynkut u Information Secretary ka FKJGP.(SP News)
