Shillong, Naiwieng, 27:U Vice President ka Khasi Students Union (KSU) u samla Fredrick Kharmawphlang ula pynbna ba ka jingialang paidbah kaban pynlong da ki 14 tylli ki sengbhalang ha ka 30 tarik mynta u bnai kan long ha Madan Student Jaiaw bad kane ka jingialang kan sdang ha ka por 12 baje mynsngi.
Une u nongialam ka KSU ula kyntu ia ki paradoh parasnam, ki kynthei bad shynrang kumjuh ia ki samla pule, ki seng bapher bapher,ki nongmihkhmat kiba don ia ka jingsngewkhia halor kane ka kam, ban wan iashimbynta ha kane ka jingialang ban ai jingkyrshan ia ka jingdawa ki sengbhalang ban pyntreikam ia ka ILP kaba dei ka ain kaba don ia ki bniat kiba nep kaban iada na ka jingwan rung laitlan ki Mynder ri bad ki bar jylla.
“Nga kyntu ruh ia ki longkmie ki longkpa la ki long na kino kino ki shnong ban iashimlang ia ka mynsiem jong ka jingsngewkhia ha kum kane ka saw ka sian bad kum ka jaidbynriew ngin pynthikna ban don ia kum katta ka ain kaba lah ban tehlakam ia ka jingwan rung kyrthep ki mynder ri bad ki bar jylla” la ong u Fredrick Kharmawphlang.
Shuh shuh ula ong ruh ba da ka mynsiem jong ka jingsngew rit, ki 14 tylli ki sengbhalang ki kyrpad ia baroh ki paidbah, ki nongsynshar shnong, ki nongsynshar Hima ha ka bri u hynniewtrep kiba dei ki trai ri trai muluk ban wan mih ryntih ha kane ka jingialang ban pyni ba ka jylla ka angnud bad ka donkam kyrkieh ia kane ka ain bad ka sorkar kadei ban pyntreikam noh mardor ia ka Inner Line Permit(ILP).
Ula iathuh ruh ba ha kane ka jingialang ki nongialam ba hakhliehduh jong ki sengbhalang kin mih madan ban don lang bad u paidbah ha katei ka sngi ban ai jingkren bad ban pynshai shuh shuh halor ka ha ILP.(SP News)
