Shillong, Iaiong 04 : Ka Wah Umshing ka long kawei na ki tyllong umdih kaba kongsan tam kaba pynbiang umbam umdih ia kiba bun ki shnong ka thian Mawlai. Katba nang iaid ki por kane ka wah ka la sdang ring sdot na ka daw ka jingkhapngiah bad kaba kham pynsngewsih ka long ka jingpynjaboh u khun bynriew ia kane ka wah kat haduh ba isait met ban pyndonkam.
Namar ka jingsngew kitkhlieh ia ka bha ka miat ka imlang sahlang, ha ka 3 tarik mynta u bnai, ki samla na ka Balang Presbyterian Phudmuri hapoh ka shatri jong ka Phudmuri Presbyterian Youth Association for Integrated Development (PPYAID), ki la hiar ban pynkhuid ia kane ka tyllong jong ka Wah Umshing. Kane ka sien jam ka long shi bynta na ka jingrakhe ia ka World Water Day 2014, da ka jingiarap bei tyngka na ka Voluntary Action 2011-12 jong ka District Planning, East Khasi Hills.
U Kongsan ha katei ka sngi u la long u Bah PBO Warjri, Addl. Chief Secretary ka Sorkar Jylla ha ka jingiadonlang u ADC, East Khasi Hills, Bah. B Mawlong, Executive Engineer PHE, Bah G Lyngdoh, u Vice Chancellor ka North Eastern Hill University, Bah Wanbantei Bremly Lyngdoh na ka World View Impact Foundation, ki nongmihkhmat na ka Mawlai Town Dorbar, ki rangbah na ka Balang bad ki khynnah skul.
Ha ka jingkren kum u kongsan, u Bah Warjri u la ong ba ka jingdon ki wah bad ki umpohliew ka la long shisha ka jingkyrkhu ia ki paid nongshong shnong ka jylla. Hynrei, katba nang iaid ki snem sngewsih pat ban iohi ba kine ki wah ki la sdang ban ring tykhong bad dap sa tang ki jaboh jabain. U la ong ruh kane baroh ka dei na ka daw jong ka jingbymsngewthuh ia ki lad ki lynti kumno ban pynkhuid ia ki jaboh kiba mih na ki iing jong ngi. U ong ba ka la dei ka por ban pynsngewthuh ia ki paidbah shaphang ki jingma kiba mih na kine ki jingmlien kiba ktah ym tang ia ka mariang, hynrei khamtam ia ka koit ka khiah jong ki briew. U kyrmen ba kane ka sienjam kaba ka PPYAID ka la shim kan long ka jingkyrsiew thiah ia kiwei pat ba kin sngewthuh ia la ka kamram bad ka jingkitkhlieh ban tyngkai bad iada ia ki um ki wah bad ia ka mariang.
U Bah Warjri u la pyntip ruh ba ka sorkar jylla lyngba ka tnat Soil & Water Conservation ka la sdang ban pyntreikam ia ka Incinerator, ka kor kaba lah ban thang ia ki jakhlia baroh tad haduh ba kin da kylla dpei. U kyrmen ba kine ki tiar ki lah ban iarap ban pynduna ia ka jingjaboh ki um bad ka mariang.(SP News)
