Jowai, Rymphang 03: Ki ar tylli ki shnong kynthup ia ka Jalyiah bad ka Khliehmyntriang ki la rai ban pyn ieng ia u ma Harvis Phawa ban iakhun na ka Muthlong Sohkymphor constituency kum u kyrtong shimet ha kane ka elekshon MDC sha ka JHADC ka ban sa long ha ka 24 tarik February 2014.
Ha jingiaid lynti kitei ki ar tylli ki Dorbar Shnong ki la iohi ba tang ma u ba lah ban iakhun ia kane ka elekshon na kitei ki shnong namar u dei ruh u Rangbah Shnong ka Shnong Jalyiah la kum ba hynniew snem tam ei ei.
Ha ka por ba u shimti ia ka kam Rangbah Shnong ha u snem 2006 u la leh shibun ki kam khamtam ha ka roi ka par ka shong suk shong sain u ialam lynti ia ka shnong sha khmat haduh mynta hi ruh. Nalor ba u long ruh u nonghikai skull L. P. School hapoh shnong u long u ba shemphang ha ka kam ka jam ha ka sain pyrthei bad u ba iohi jngai ia ka lawei kumjuh.
Ka thong hi jong u kum u candidate ka long ban pynkhliañ ia ki ain ki kanun ha JHADC na ka bynta ban iada ia jait bynriew katkum ka six schedule, katkum ka constitution ka ri India.
Na ka liang jong , u Secretary shnong ka shnong Jalyiah u bah Shillong Dkhar lem bad kitei ki artylli ki Dorbar Dorbar shnong ki khot ki wer ia phi ki paidbah ka constituency ba phin sngewbha ban ai ka jingkyrshan ia ki ha ka ne ka kynti khnang ban rah ia ka jingjop ba don burom.(SP News)
