SHILLONG, K`Lyngkot 12: Hadien ba ka Election Commission jong ka Ri India ka la pynbna ba ia ka elekshon sha ka Iingdurbar Thawain ka ban long mynta u snem (2013) ba ha Meghalaya ka jingthep vote ban jied ia Ki Nongmihkhmat ba thymmai (MLA) la pynbna ba kan long ha ka 243 tarik u Rymphang, ka Code of Conduct bala pynbna da ka Election Commission ruh ka la treikam noh mardor naduh ba la pynbna ia ka.
Haba pyntreikam ia ka hukum jong ka Election Commission, ki bor ba dei khmih ia ka shongsuk shongsain, khamtam na ka bynta ka elekshon ban wan la pynjari ia ka kyndon (Section) 144 Cr.PC ha baroh kawei ka jylla ban khanglad ia ki jingthoh bad tah ia ki poster ha ki kynroh surok ne iingbriew.
Ki jingpynieng lane pyni ia ki dur jong ki kyrtong bad ki banner jong ki seng sain hima lane ki shap ruh la dep khang. Ha kajuh ka por, ki bor pyniaid jong ka East Garo Hills district ki la pynsangeh noh shi por ia ki laisen tiar siat bad yn ym ai laisen na ka bynta ban thied tiar siat tad haduh ban da kut syndon ki kam elekshon.
Ki bor pyniaid jong ka district ki la khang ruh ban thoh ia kino kino ki jingthoh pynshit kiba lah ban wanrah ia ka jingiashun iapen hapdeng ki kynhun jaidbynriew.
