Shillong, Kyllalyngkot 08: Ka cabinet kaba la long mynta ka sngi ha ka jingiashong pyrkhat kam ka la shim ia ka rai ban pynjlan shuh ia ka por trei kam jong ka GHADC da hynriew bnai bad ia ki ar tylli ki iing dorbar ka KHADC bad JHADC da 15 sngi.
U myntri rangbah ka jylla u Dr Mukul Sangma haba kren ha ki nongthoh khubor u la ong ba kane ka jingpynjlan ia ka por jong ka iing dorbar jong ka JHADC ka long ban ailad ia ki dkhot jong ka ANVC ba kin ioh ban ia shim bynta ha ka election ka ban sa long ha katei ka iing dorbar.
Kane ka jingpynjlan ka long halor ka nongrim ba kan don ka jingiasoi ia ka soskular ia suk hapdeng katei ka seng lehnoh ANVC bad ka sorkar pdeng bad ka don ka jingkyrmen ba lah ban pynbun shuh ia ki dkhot jong ka iing dorbar na ka 29 ngut sha ka 40 ngut.
Kumba ka long mynta ka jingpynkhreh ban ia soi ia ka soskular ia suk hapdeng ka ANVC bad ka sorkar pdeng ka la don hapdeng ka jingpynkhreh bad lada ka don noh kane ka jingiasoi la hap ban burom ia kane ka jingiateh kular kumta la hap ban pynjlan noh ia ka por trei kam jong ka tei ka iing dorbar.
Ha ka jingshisha kine ki lai tylli ki iing dorbar ka por trei kam jong ki kan kut ha ka 17 tarik jong u bnai Rymphang mynta u snem.
Haba ia dei bad ka Delimitation Bill jong ka JHADC la ong ba ka cabinet ka la pdiang ia ka bad mynta yn phah sha u Lat jong ka jylla na ka bynta ban ioh ia ka jingmynjur ka jong u. Ia kane ka bill la pass da katei ka iing dorbar ha u snem ba la dep. Shuwa ban phah sha u Lat ka sorkar ka la dep ban peit bniah ia kane ka Bill jong ka JHADC.(SP News)
