Shillong, Nohprah 08: Ka FKJGP Central body lyngba ka kyrwoh na u General Secretary bah Wellbirth Rani ka pyntip ba ha ka jingiakynduh lang ki nongialam ki 13 Seng , ki la shim ia ka rai ban buh da ka Bandh kaba 36 kynta kaban sdang naduh 10tarik Nohprah por 5:00 baje mynstep haduh 11tarik Nohprah 5:00 baje janmiet,bad kan treikam ha baroh ka Ri khasi Jaintia lait noh ka Garo hills.Bad kan bud pat da ka Picketing Office ha ka 13tarik Nohprah ha baroh kawei ka state Meghalaya bad ha Garo Hills kan don tang ka night Roadblockade ha ka 10 bad 11 tarik Nohprah kaban sdang naduh 8:00 baje janmiet bad kut haduh 5:00 baje mynstep. Kane ka jingshim rai jong ki 13 Sengbhalang ban pynjur ia kine ki jingiakhih kadei halor ka jingkuman jong ka Sorkar haduh mynta ban pyntreikam ia ka ILP.
Ki Sengbhalang ki kynthoh ruh ia ka shithi kaba wan lyngba na u Shambhu Singh Joint Secretary (North East) jong ka union ministry of Home Affairs(Kam Poh Ing) ha kaba la pynpaw ba ym lah ban pyntreikam ia ka ILP ha kane ka jylla ka long ka jingialam bakla ia ki paidbah namar ba kane ka Bengal Eastern Frontier Regulation Act 1873 ka long kaba im haduh mynta (Exist). Ki Seng ki pynpaw ruh ba ha Manipur ka ILP ka hap iaid lynba ka Central Government namar ba ka ILP ha Manipur kam pat don naduh mynshwa,hynrei kane ka ain ka la don lypa ha kane ka jylla Meghalaya bad tang da ka notification jong ka State Government la lah ban pyntreikam ia ka ILP ha kane ka jylla.
Ki Sengbhalang ruh ki kyrpad ia baroh ki paidbah, ki paradoh parasnam ba kin ia snohktilang ha kine ki program iakhih jong ki Sengbhalang, bad kumjuh ruh kin dang ai ka jingkyrshan kaba pura ia ka jingialeh nangne shakhmat jong ki Sengbhalang kiban dang iai dawa ban pyntreikam ia ka ILP. Ka jingialeh jong ki Sengbhalang ka dei ka jingmyntoi jong ki khun ki kti bad ki pateng kiban dang wan jong ka Ri bad ka jaitbynriew baroh kawei, kane ka long katkum ka kyrwoh kaba la phah da u Genenral Secretary jong ka seng FKJGP central Body u Bah Willberth Rani.(SP News)
