Shillong, K’lyngkot 02: Ka North Shillong Block Congress Committee, ka la pynkup burom ia u Dr Friday Lyngdoh, MLA barim bad u President barim jong ka Meghalaya PCC, ha kaba la pynlong ia ka jingrakhe hynne ka sngi ha iingsah jong u ha Mawkhar, Shillong, ha ka jingdon ryngkat jong ka Myntri ki kam pohiing ka Kong Roshan Warjri,kaba long ruh ha kajuh ka por ka nongmihkhmat jong ka Mawkhar.
Ha katei ka sngi la don ryngkat ruh u Bah W H D Syngkon, ba long u nongai jingmut jong ka MPCC, ha kaba la don ruh ki nongialam jong ki Unit bapher bapher jong ka Block Congress Committee, ba kynthup ia ka Mahila Congress bad ka Youth Congress, ba hap hapoh ka 17 North Shillong constituency.
La pule ruh ia ka poetry sha u ne u rangbah kum ka dak ban kynmaw burom bad ban ithuh ne sah kynmaw ia ka jingtreikam jong u ha kine ki snem ba la leit baroh ha ka sain hima sima bad ia ki jingnoh synniang jong u sha ki briew jong kane ka constituency, kumjuh ruh ia ka jylla baroh kawei. Ha katei ka sngi u la pyllait paidbah ruh ia ar tylli ki kali kit niut.(SP News)
